Aizawl: Lawngtlai district magistrate thuchhuah palzuta Aizawl atanga kal, October 13, 2026-a Lawngtlai AOC Veng Branch YLA-ten Tata Yodha 10 an man chungchangah, a dealer-te nen intiamkamna an neih theih chuan heng lirtheite hi thawn let rem tih a ni.
He thutlukna hi Ningani khan Lawngtlai bawrhsap Donny Lalruatsanga hovin a pisa-a Lawngtlai AOC YLA branch hruaitute nen hemi chungchang sawihoa an thukhawmah siam a ni.
Thutkhawmah hian District Magistrate-in sumdawnna kalpui chungchanga thuchhuah a lo siam tawh chu tha taka kenkawh a, kawng engkimah thawhho pui zel ni se tiin rel a ni.
AOC YLA Branch-ten Tata Yodha 10 an man hi Enforcement (DTO) kutah hlan fel a ni tawh a, dan lova tlan tura ngaih anih avangin pawi an tih thu an sawi a. Bawrhsap Donny Lalruatsanga chuan raltlante mumal zawka khuahkhirh leh Myanmar nena sumdawnnaah fimkhur taka hmalak mek a nih thu sawiin, LADC leh tlawmngai pawl (NGO)-te nen pheikhairual taka an thawhhona chungah lawmthu a sawi bawk.
Mumal taka lirthei lut leh chhuak enfiah a nih laia thuneitute hriatpui lova endik leh pawisa lo lak ching an awm thin nia thuthang awm chu Bawrhsap chuan mi mal takin pawi a tih thu a sawi a, hetiang thil ti thinte chu zawn chhuaha dan anga hma lak a nih tur thu a sawi a. District administration chuan dan leh thupek kenkawh kawngah theihtawp a chhuah zel dawn tih sawiin, sorkar hmalakna tawiawm zel turin tlawmngai pawlte leh Lawngtlai mipui a sawm a ni.
He hmalakna chungchangah hian Central Young Lai Association (CYLA) hruaitute pawhin dan lova sum leh pai khawn thinte chungah theih ang anga hma an lak mek thu leh district administration-in dan leh thupek kenkawh kawnga hma a lakna chu an thlawp tlat thu an sawi a, chak taka hma an lak zel tur thu an sawi bawk.