Mizoram chu Corporate Social Responsibility (CSR) fund dawng tlem ber state-te zinga mi a ni a, corporate liante’n an CSR hmangin tam zawkin hma la an duh tih chief minister Lalduhoma’n a sawi.
Ningani khan Civil Hospital, Lungleia hman tur Ambulance thar chu Health & Family Welfare Department hotute hnenah chief minister hian a hlan a. Ambulance hi Chief Minister’s Charitable Trust hmalaknain Rays Power Infra Ltd-te CSR fund hmanga lei a ni a. An hotuten chief minister hnena an hlan hmasak hnuah a hmangtu tur hnenah a hlan ta a ni.
Chief Minister chuan an CSR fund hmanga Mizoram tana hna an thawh avangin Rays Power Infra Ltd-te chungah lawmthu a sawi a, Mizoram chu CSR fund dawng tlem ber state-te zinga mi a nih thu sawiin, corporate lian zawkte pawhin an CSR hmanga Mizoramah hma an lak belh zel a duh thu a sawi bawk.
Ambulance hi Health & Family Welfare Department aiawhin Lalnunmawii, Addl. Secretary leh Dr. Lucy Ramhmingliani Renthlei ten an dawng a, Rays Power Infra Ltd. aiawhin Siddarth Sharma, CA (North East Commercial & Finance Head) leh Gordhan Sharma an tel a ni.
Chief Minister’s Charitable Trust aiawhin CEO R. Lalrodingi, Secretary Raymond Lalmuana leh member Lalrinawma Khiangte-te pawh an tel a ni.