- Mahmuaka Chhakchhuak
Digital leh AI lam hmang tangkai viau tawh mah ila
Lehkhabu hlutna chu ala chuai tak tak thei chuang lo
Mizo Writer Association (MWA) chuan Lehkhabu Pho chhuah Runpui (LPR) vawi rukna chu Oct. 16, 2026 atanga Oct. 24, 2026 thleng tura buatsaih chu Pu B. Lalchhanzova, MoS chuan Vanapa Hall Hulhliap-ah hawngin ziak mi 128-te kutchhuak lehkhabu chi hrang hrang 1000 chuang an pho chhuak. LPR-6 hawngtu Minister hi MWA hruaitute’n a duh ber lehkhabu leisak an tum a, B. Lalthangliana ziak KA LUNGKHAM bu chu a duh ber thu a sawi a, lawm takin an leisak a ni.
Lehkhabu Pho chhuah Runpui hi tum nga lo buatsaih tawh a niin tun tum hi a tum rukna a ni a, Pathian zarah tluang taka hun lo hman tawh thin a ni. Kuminah pawh hian a tum rukna atan a hmun ngai: Vanapa Hall Hulhliapah bawk buatsaih leh a ni a, kum kal liam ta teah chuan lehkhabu tlangzarh nghal a ni thinin kum 2025-ah ngei pawh khan lehkhabu 15 lai tlangzarh a ni a, kuminah erawh hun leh hmun a chep deuh avangin lehkhabu tlangzarhna hun hi hman a ni ta lo. Chuti chung chuan LPR-6 ah hian lehkhabu chhuak thar engemawzat pho chhuah a ni a, chung lehkhabu chhuak thar pho chhuah kan han hriat theih maite chu:
ZALENNA SUALTU AU AW: Thang Sian Tluang
CHUAILO -6: R.L. Thanmawia
MITIN MIL SUH: Lalsiamkima Samte
TUIKEPLUNG: Mama Khiangte
Mizo RAP MUSIC: C. Lalruatzauva
DAN ZIRNA: K. Remruatfela
Mizo Hnam Puipate: C. Vanlallawma
Rev. Dr. Rohmingliana: Lalrinmuani
LUSHAI SCOUTS: R.K. Hranga
The True Identity Zofate: Rev. Dr. Zaichhawna Hlondo
NUNNA TUI: Mahmuaka Chhakchhuak
ISRAEL HNAM BO HMUHCHHUAH A NI TA: Dr. PC. Biaksiama
Mizoram GK Mini Edition- 12: Dr. Lalhmachhuana
BEISEINA KHAWVEL -2: K.C. Lalthansanga
Ka Thu Thu: K.C. Lalthansanga
Ziakfung ZALEN-3: H. Lalawmpuia
PHUN|IHA: Lalsangzuala
LELTHANG: Dr. Lalsangzuala
USA leh Unaute: Vanneihtluanga
PUAN|HUI ZIRNA: Zothanmawii Khawlhring
A hun laia Mizo HLA LARTE: Ellis Saidenga
LALLIANMAWIA PACHUAU: Eddy Zosangliana Colney
MIZO THAWNTHU ZIR CHIANNA: V.L. Zaikima
MIZO HNAM NUN: K. Tlanghmingthanga
LAL THANHAWLA: Sanjoy Hazarika
Mizo hla leh HUMOUR: Hriatchhunga Colney
The Metamorphosis: Isaak Roluahpuia
Rakla Hisap II: Jonathan Lalrinmawia
Thu mawi khumtu: Hriatpuia Kion
LALZIKA AND VANTHANGI: Laltluangliana Khiangte
HMA LAM PANIN: Mahmuaka Chhakchhuak
TUNLAI ZORAM TITI: Tluanga Chhakchhuak
LPR-6 hi a tir phat atangin tlawhtu an thahnem ang reng hle mai a, ni hmasa berah hian Cheng 2,07,850 hmuhchhuah a ni a, kum hmasa, 2025 LPR ni hmasa berah khan Cheng 1,69,588 hmuhchhuah a niin kuminah hian Cheng 38,262 laiin kan hmu tam zawk a, hei hian leitu an tam zawk tih a tarlang. Chutih rual chuan kuminah hian lehkhabu lar hluai a awm hran lo a, hralh kal bik tak pawh a awm chuang lo.
Ni hmasa berah khan Pathian thu lam hawi lehkhabu hralh a kal berin a hriat a, Novel leh Drama leh Fiction lam lehkhabu chu hralh a kal vak loin a hriat. Tun tumah hian TRI lam an rawn inpho lo hian khua an tihar deuh a, amaherawhchu lehkhabu hlui leh hlu tak takte phochhuah a awm thei tho hi a lawmawm. Chutianga lehkhabu hlui leh hlu tak zinga pakhat chu ‘Mandalay Rose Par’ tih, a hunlaia Cheng 4 man chu Cheng 250-a hralh a ni a. ZORAM ENCLYCLOPEDIA (B. Lalthangliana buatsaih) erawh hmuh tur a awm ta lo a, BoY hmasa ber KA LUNGKHAM chu chhut thar a niin LPR-6 hian pho chhuah a ni a, a lawmawm hle.
Hetianga mitin tana lehkhabu tha tak tak lei theih tura MWA in an buatsaih hi a lawmawm hle mai a, kan sawi hmaih hauh loh tur chu heng lehkhabu zawrh chhuahte hi a man tlawm veka zawrh a ni a, lehkhabu man tlawma zawrh rem rih lo erawh panga vel chauh a awm a, chungte chu lehkhabu thar diai an nih vang a ni hlawm a. Tun tumah hian thil thar pakhat awm chu Online atanga lei theih tura buatsaih a niin, ‘Siruk Chhuar’ App atangin LPR-a pho chhuahte hi a man tarchhuah ang anga hralh theih tura an buatsaih avangin hmun dang atang pawhin Vanapa Hall Hulhliapa kal kher ngai loin a lei theih dawn a ni.
Lehkhabu ziaktute tan ngei pawh hetianga pho chhuah theihna hun leh hmun buatsaih hi a lawmawm a, a leitute tan pawh thil lawmawm tak a ni. Vanapa Hall hulhliapa rawn kal tam takte hi lehkhabu lei tumsa nei lo a, a hmuna lei tur rawn zawng chawp an ni tlangpui a. Chutiangte chuan muangchangin lehkhabu an thlir a, an lei turte thlir kualna hun a awm a, zawhfiah theihna hun a awm leh a ziaktute ngei pawh biangbiak theihna hun a awm hi a lawmawm hle. A bik takin ziaktu chhuanawm leh upa lam tawh Pu B. Lalthangliana thlalakpui theiha a awm thei hi a lawmawm a, thla lakpuitu thangtharte tan ngei pawh a lawmawmin a hlu viau ngeiin a rinawm.
Lunglei lam atangin mi paruk kutchhuak lehkhabu sawm pathum vel lei tur a awm bawk a, kum hmasaah khan Prof. J. Zorema ziak KUMPINU LEH MIZOTE pawh chu hralh zawh a nih tawh avangin tun tumah hian pho chhuah tur awm ta lo a. Kum 1992-a chhut tawh, Indopui Pahnihnaa Japan sipai sang rual hnehtu leh umkirtu LUSHAI SCOUTS te chanchin, a hunlaia Captain R.K. Hranga ziak chu lei tur a awm thei hlauh thung. Naupang lam chhiar tur bika buatsaih lehkhabu pawh engemawzat a awmin Arabian Night leh Sherlock Holmes a bu kima lei tur a awm bawk.
A hmun ngeiah rawn kal la, zing lam dar sawm leh tlai lam dar ruk thlengin an inpho a, man tlawm tak taka i lei bakah a ziaktu signature chuang ngei lehkhabu lei i duh pawhin a rem chang viau ngei ang.