Aizawl: Serchhip Chanmari Branch YMA chuan an kum 50-na (Golden Jubilee) chu Thawhtanni khan Zotawna Futsal Ground-ah ropui takin an lawm a, he hun hi Lunglei West bialtu MLA, T. Lalhlimpuia chuan khuallian niin a hmanpui.
Khuallian chuan Chief Minister Lalduhoma aiawha duhsakna chibai bukin he hun hmanpui tura sawm an nih avangin lawmthu a sawi a, Chanmari Veng chu amah ngei pawh a lo khawsak tawhna hmun leh an ngainat a nih thu a sawi.
Golden Jubilee lawmna hun hi Chanmari Branch YMA President C. Vanlalthlana chuan a kaihruai a, khuallian hian Jubilee hriatrengna lungphun hawngin, Chanmari VC President T. Lalengruala’n Souvenir a tlangzarh nghal.
Branch YMA Secretary K. Lalduhsaka hnen atangin chanchin tlangpui ngaihthlak a ni a, hruaitu hluite hnenah chawimawina hlan a ni bawk.
Chanmari Branch YMA hi September 21, 1975-a Bawngchawm YMA atanga indan dilna pawm a nih loh hnua April 16, 1976-a ‘Tarpi Section’ tia din tan a ni a. April 16, 1993-ah Branch YMA-ah hlankai niin, kumin April 16 khan kum 50 tlingin a lawmna bul tan a ni a, Thawhtanni khan a lawmna pui ber leh a kharna hun hi hman a ni.
Tun dinhmunah Serchhip Chanmari Branch YMA-ah hian mipa 422, hmeichhia 188 leh Life Member 14 awmin, an vaiin member 624 an awm mek a ni.