Aizawl: Khawvel pum huapa The Salvation Army hotu lu ber, General Lyndon Buckingham leh a nupui, Commissioner Bronwyn Buckingham, World President of Women’s Ministries (WPWM) te chuan Territorial Congress 2026 India Eastern Territory (IET)-a hun hmang turin Thawhlehni tlai dar 3:20 khan Lengpui Airport an thleng.
Lengpui Airport Chapel-ah Salvation Army India Eastern Territory Chief Secretary, Lt. Col. M. Stalin chuan inlawmna leh hunserh a hmang a. General-te nupa hian anmahni hmuaktute leh India Eastern Territory-a sipaite lawmna chibai bukin thu an sawi bawk.
He hunah hian Territorial Staff Band leh Territorial Staff Songsters te’n rimawi leh zai hmangin rawngbawlna an nei a, Territorial Commander, Colonel Lalbulliana’n tawngtainain inlawmna inkhawm hi a khar a ni.
Hmuahna hunah hian India Eastern Territory chhunga Salvation Army Officer te, rawngbawltute leh Salvation Army Motorcycle Ministry te chuan ropui takin lirthei nen an lo hmuak a. Kawng dungah Sairang Corps, Phunchawng Corps, Hunthar Corps leh Dawrpui Vengthar Corps ten an lo lawm bawk.
General-te nupa hian October 27, 2026 thleng India Eastern Territory-a sipaite nen hun an hmangho dawn a; Nilaini zan hian State Guest an nih angin Chief Minister Lalduhoma’n zanriah a buatsaihsak dawn a ni.
General te nupa hi chawlhkar khat chhung Mizoramah an cham dawn a ni.
The Salvation Army hian khawvel ram 134 ah rawngbawlna a kalpui mek a, member maktaduai hnih dawn a nei mek a ni.