Mizoram chhunga sumdawnna kalpui zawng zawng ten dan leh hrai an zawm a, permit neih ngai sumdawnna kalpuituten permit an neih ngei theih nan Mizoram Merchants’ Association (MIMA) chuan dan zawm lova sumdawnna kalpui rinhlelhawmte enfiaha dan anga hma la tur Action Committee a din.
Mizoram chhung, a bikin Aizawl khawpui chhunga dan zawm lova sumdawnna hluar chho mek leh home delivery hmanga bungrua leh ei leh bar zuarchhuaktu an pun zel avangin MIMA Action Committee chuan heng thilte hian tualchhung dawr neitute leh Zofate eizawnna a nghawng nasat thu sawiin, dan zawm lova sumdawng nia rinhlelhte chu thuneitute hnena report thuai turin mipui leh thuneitute an ngen.
MIMA Action Committee chuan, Mizo mipuite chu Inner Line Permit (ILP) sponsor chungchangah te, dawr leh sumdawnna hmun luahtir kawngah te, leh Mizo hming hmanga hnam dangten sumdawnna an kalpui chungchangah nasa zawka fimkhur turin an chah a. Mizo hming hawhtir emaw, hnam dangte dawr luahtir emaw, sponsor lo awm an nih chuan a rang lama inching fel turin an chah bawk.
Tual chhung eizawnna leh hnam chim ral a nih loh nan veng tina home delivery vak kual thinte dawr mai lo va, dan zawm a sumdawng an nih leh nih loh finfiah hmasak thin a, rinhlelhna awmte chu Police, Aizawl Municipal Corporation (AMC), MIMA emaw department mawhphurtute hnena report zel turin mipui an chah a ni.
Hei bakah, thuneitute pawh Trade Licence, ILP leh sumdawn phalna mamawh dangte neih a ni leh ni lo enfiah tur leh, dan zawm lohna a awm a nih chuan dan pui angin chak taka hma la turin MIMA Action Committee chuan an ngen bawk.