Aizawl: Chhandamna Kohhran (Salvation Church of India – SCI) chuan ‘Chanchin tha hi hril rawh u’ tih thupui hmanga rawngbawlna an kalpui mek zelah Pathianni khan an Mission Field state thum — Odisha, Andhra Pradesh leh Assam-ah te biak in thar pali a ruala hawngin Pathian hnenah an hlan.
Biak in thar hawnna hi Pathianni chawhma dar 10:30 khan a rualin neih a ni a. Jeypore (Odisha) biak in chu a donor Evan Upa R. Lalmalsawma’n a hawng a; Mundigudha (Odisha) biak in chu Upa Chalneihzawna, SCI Treasurer leh National Social, Emergency, Mission & Revival Committee Secretary-in a hawng bawk.
Anakapalle (Andhra Pradesh) biak in chu Upa Dr. H. Lianzela, SCI Vice President leh Chairman National Social, Emergency, Mission & Revival Committee-in a hawng a; Rongmili (Assam) biak in chu Upa Rosiamhnuna, SCI President-in a hawng thung.
He hun hmanpui hian SCI hruaitu hrang hrangte leh Dinthar Kohhran SCI Hmeichhe Pawl (SHP) member-te an zin chhuak a ni.
SCI hian June, 2016 khan ramthar rawngbawlna bul an tan a, harsatna leh dodalna hrang hrang karah ring thar enkawl chho zelin state pali (Odisha, Andhra Pradesh, Tripura leh Assam)-ah te ramthar rawngbawlna hi an kalpui mek a ni.
Biak in thar pali hawn a nih takah chuan SCI hian ramthar field-ahte biak in 11 an nei tling ta a. Harsatna tam tak kara biak in duhawm tak tak an lo din thei hi Pathian tanpuina leh mipuite thilpek zar a nih thu sawiin, SCI hruaitute chuan lawmthu an sawi a, Kohhran hote chu Pathian ram zauhna tura tawngtai chhunzawm zel turin an chah a ni.