Aizawl: Aizawl East I bialtu MLA Lalthansanga chuan Thawhlehni khan Zemabawk West veng chhunga inkalpawhna kawng siam thar a hawng.
Kawng thar hawnna hunah hian bialtu MLA Lalthansanga chuan Zemabawk West-ah hmasawnna hna thawh tur tam tak a awm thu sawiin, local council, NGO, khawtlang mipui leh bialtu Corporator-te thawh rimna avanga inkalpawhna kawng tha tak neih a ni chu lawmawm a tih thu a sawi a. Hmasawnna thlengte chu khawtlang mipui ta a nih angin, uluk taka enkawl zui zel chu mipuite mawhphurhna a ni tih hriaa enkawl chhunzawm turin kalkhawmte a chah.
Khawtlang hmasawnna tluan tling a awm theih nan sorkar leh bialtu MLA-te thlawp zel turin mipui a sawm a; thalaite zinga ruihhlo hluar mek chu tihtakzeta do a ngai a ni tih sawiin, chhungkua leh inrelbawlna tha nei turin NGO leh chhung tinte mawhphurhna la turin a fuih bawk.
Kawng thar hawnna inkhawm hi David Lalsiamkima, Vice Chairman, Zemabawk West Local Council-in a kaihruai a. Zochhuana, Corporator (Ward VII) pawhin thu an sawi bawk.