Aizawl: Lawngtlai Police chuan tun hnaia ruihhlo an man, Rs vaibelchhe 1.43 man hu chu Nilaini khan District Hospital, Lawngtlai-ah damdawi hmangin an tichhia.
Ruihhlo tihchhiat takte hi methamphetamine kg 1.796 leh ganja kg 4.22 niin, Magistrate-ten a hmuna an enfiah leh an remtih hnuah, District Hospital-ah damdawi hmanga chiahin tihchhiat a ni a, a paihna tur hmun bikah paih nghal vek a ni.
He hunah hian Lawngtlai Superintendent of Police (SP) Dheeraj Dwarka Gaadhi chuan ruihhloin district chhungah bu a khuar loh nan Lawngtlai Police-ten theihtawp chhuahin tan an la reng tih a sawi a. Ruihhlo do chungchangah district chhunga tlawmngai pawl te leh mipuite thawhhona a tha hle tih sawiin, hma sawna ruihhlo do zui zelna atan nasa zawka thawhpuiah mipui a sawm nghal bawk.