Mizo Writers Association chuan Lehkhabu Pho Runpui thawh rukna nei mekin, hluttu a ni telin an tam telh telh a, an pawisa hmuhchhuah pawh kumdang aiin a tam tawh hle.
Holam taka ngaihtuahna hman pawhin kan ram thalaite hian lehkhabu an ngainain, an chhiar nasa leh tawh tih a hriat theih a, tuna LPR-6 neih mek pawh hian nasa takin hna a thawk tih a hriat theih bawk.
Lehkhabu ngaina leh chhiar nasa apiang hnam fing an ni a, an hnam pawhin kawng dik an zawh tlangpui thin. Hetiang a nih avang hian tuna kan thalaite lehkhabu lei leh chhiar kawnga an thangharhna pawh hian kan hnam kal zel turah rah tha a chhuah ngeiin a rinawm a, ruihhlo avanga buai lo thalai za tam an awm tih pawh hi chhinchhiah tlak a va ni em.
Kan ram hian hmasawn turin ke a pen chho zel dawn tih a hriat a, LPR-6 atang ringawt pawh hian thalai lehkhabu ngainate hmel hmuh tur a awm a, hei hi Aizawl khawpui chhung chauh a la ni tlangpui zawk a, rampum thlir phei chuan lehkhabu kan hlutna hi a sang chho leh hle tih pawh hriat a tha hle.
Ruihhloin min sawisak a, thalai tam tak nun a tawi hnuah pawh zira chhiar peih kan tam chho leh tih hriat hi a lawmawm a, a nuam a, kan hnam hian kawng dik a zawh ngei ang tih a rinawm bawk. Lehkhabu lei an tam chuan chhiar vek lo mah se, chhiar an awm ngei ngei dawn tih a hriat a, changkanna a ni hrim hrim bawk e.