Aizawl: Ram leh hnam venhimna hna thawh laia nunna chan police-te chawimawina leh sunna ni, Police Commemoration Day chu ram chhung hmun dangte rualin Nilaini khan Mizoram chhung hmun hrang hrangah urhsun taka hman a ni.
Nilaini zing dar 7 khan Mizoram Police hmunpui hrang hrang, District Headquarters leh Battalion Headquarters-ah te Commemoration Parade hi neih a ni a. Mizoram Police hnuaia parade hmanna pui ber hi 1st Bn. MAP Headquarters, Armed Veng, Aizawl-a ‘Martar Thlan’-ah Director General of Police (DGP) Sharad Agarwal hova hman a ni. He hunah hian Mizoram Police senior officer-te leh sister agency-a officer lo kalte nen martarte sunna neih a ni a, martar thlanah hian zahna pangpar an dah bawk.
September 1, 2025 atanga August 31, 2026 inkar khan India ram pumah police mi 154-in ram leh hnam tan nunna an hlan a. Mizoram Police zingah kumin hian duty laia hmelma kuta thi an awm lo thung. Kum 1966 atanga vawiin thlengin Mizoram Police zingah ram leh hnam tana nunna hlan hi mi 54 an awm tawh a ni.
Police Commemoration Day pual hian Motorcycle Rally pawh buatsaih a ni a, Mizoram Police atangin mi pariat awmna Motorcycle Rally Team-te chu October 6, 2026 khan PHQ Aizawl atangin an chhuak a. Anni hian October 31, 2026-a Kevadia, Gujarat-a Ekta Parade 2026 an telpui dawn a ni.