- Zirsangkima
Mahni leh mahni birthday ka inlawmsak hma kár hnih liamta—chumi hma zawnga ka nupui—Stella Duati nèna kan inkár khawvêl tàwp lam kha chu, buai tak a ni—niai niaiin a! Kum nga chhúng fa pai thei lo kan nihna te; kan nupa inkára inrinhlelhnain bû a khuar tlat avàng te leh a hna avànga kan inkára khì awm tâte khân lú mai a ti hai lo a, ngaihtuahna kalding tùr zawng zawng pawh a ti ding zo vek a, a ti mu ta thuap mai a nih kha!
𝗥𝘂𝗮𝗵 𝘀𝘂𝗿 𝗹𝗲𝗵 𝗸𝗮𝗻 𝗻𝘂𝗻
June thla a ni a. Duhthawh zetin ruah a súr buan buan a. Office-a ka pindanah chuan ka thu ngawi reng a. Tukverh pawh ka khär duh lo. Thlang deuha thingkûng insawi dual dual te chu melh thlûk tum ni àwm fahrana ulukin ka melh tlawk tlawk reng a. Engati nge maw ni, Stella nèna kan inkára thil a thlen emaw, a thlen dáwn emaw apiang hian ruah a sùr ve ziah le, tihte ka ngaihtuah a.
Kum ruk liamtaa nihliap pâwl neitu a nihna te kha—ruah a sùr vànga nihliap pâwl kha keng chhuak a ni mai a. Súr lo sela a nihliap pâwl kha a kap parh àwm tawp si lo a … tihte chuan ka rilru a kap daih a. Tin, khami tlai—kan intawn tlaia kan ina ruah han hun a nghah tlatzia te kha. Car sen neitunu kha, ruah súr hnuaiah pawh a hàw theih tehrëng nèn, ka inah khán a chám lui tlat roh a. Tlai—tlai tak thleng, zàn inkhâwm tùr emaw, committee tùr emaw chu ni se a tlai thak ang, tih tùr thleng thlengin amah kha ka thleng a nih kha—kan tlai hmasa berah khán.
Ka hmaah chuan file chin fel ngai a inpharh niai a. Chûng ka dawhkàna ka hnàte chuan ka rilru an la péng thei rëng rëng lo. Ni thum vêl chauh he Superintendent office hi ka la luah lum ve chauh a; file pending erawh ka ngah ta hle; nikhua lo pawh ka inti.
Zaninah eng thil nge kan inah thleng ang? Kan nupa inkár thu chu tih tàwp a ni tawh mai ang em? Ka duh loh ber thil hi ka chanvo a ni tawh mai ang em? Nasa takin Stella chu chelh tum ta ila, ka chelh zo ang em? Hêng, chhànna nei lo zawhnate hian ka rilru an ti buai hle.
Ruah chu páwnah mai ni lo, ka chhúng rilah hian a súr buan buan bawk a. Khawpui ri mai ni lo, têk pawh a rawn thleng hnaiin ka ring!
𝗛𝗿𝗶𝗮𝘁 𝗰𝗵𝗶𝗮𝗻𝗻𝗮 𝗵𝗹𝘂 𝗹𝗲𝗵 𝗵𝗿𝗶𝗮𝘁 𝗰𝗵𝗶𝗮𝗻 𝗹𝗼𝗵𝗻𝗮 𝗱𝘂𝗵𝗮𝘄𝗺 𝗹𝗼!
Ka dawhkàna file síra black coffee, noa ka inchhawp pawh chu a dai lam a ni tawh. Coffee chu ka’n khiat hrawih a. Thlumna rëng a nei tawh lo. A kha fuk mai. Chu chu ka tün dinhmun nèn inang chiahin ka hria—a thlum lo a, a tui hek lo! Lem pawh a nuam hlawl lo!
Chutih rual chuan ka rilruah, Stella min hriat chian dànte chuan ka ngaihtuahna an rawn luah leh nghâl chat a…
Ka coffee duh tak dàn te; coffee mai ni lo, ka sa duh záwng—leh a siam nána ka masala hman duh bîk te; ka thawmhnaw rawng ngainat záwng te; sam ka khuih duh kher kher dàn te leh ka sahbon hman duh te, shaving cream leh after shave lotion ka hman duh bîk te leh kerkawrte rawng duh bîk ka neihte thlenga hre vektu awm chhun chu amah Stella chauh hi a ni. Amah lal Davida ianga, “Chuti kauhva hriatna chu … a sáng êma ka phâk lo a ni,” tih ve mai ka duh hial thìn!
Heti khawpa min hriat chianna chhan hi, ka nupui, min hmangaiha ka rawng min bàwlsaktu a nih vàng a ni. Ka inbual zo bual in ka chhuahsan chiah te hian, kekawrte leh ka thawmhnaw hâk tùr te hi, hâk sain min pe lo chauh thìn!
Chuti kauha min hre chiangtu chuan hmangaihna avàngin kum nga chhúng min khawsakpui a; min hre chiang tâwk hle. Ka nui thäwm ringawt paw’n a hmélah hlim hmél a chhuahtír thei a; ka tah rualin a mit atä mittui a hnám chhuak ve nghâl thìn. Chuti kauha min hnaihna leh min hriat chianna chu, ka tán hian a hlu êm a—chàn phal chi a ni lul lo.
Kei ve thung erawh hi chuan Stella min hriat chian ang hian amah hi ka hre chiang ve lo nasa mai! Hriat chian pawh ka tum hran ngai lo. Amah ka hre chiang lo lutuk hi ka buai phah fo a; tül loa rilru hahna leh kan nupa inkára inhauhna ti chhuak fotu a ni—kan inkára thil duhawm lo ber thlentu pawh a nih dáwn tâk hi!
𝗠𝗶𝗽𝗮 𝗱𝗮𝗻𝗴?
A thawhna bank-a a thawhpui, Malsawma nèna an inzui êm êm dàn te khân kan nupa inkár a ti khi nasa zual! He tlangvál Sàwma nèn hian, hun rei tak atang tawhin ka ringhlel tlat a.
Tum khat pawh, Sàwma chu kan ina zanriah ei tùrin a rawn sáwm pek a! Chaw ei a tui duh lo teh kher asin! Chaw ei lai pawh chuan an pahnih chuan an nui dùn leh awr awr thìn a. Hma takah ka khamsan. A kham rualin Sàwma chu ka hnawt häw nghâl a nih kha!
Khami zàn khán inngaihtuah nawnna hun pawh ka nei hman lo; mawi leh mawi lo pawh ka thlu hman hek lo. Ka thin a rim ve êm atin ni!
Mahse, a hnu lawkah Sàwma chu an bank-a Stella thian tha ber a ni tih ka chian leh si! A thla leh maiah nupui hmel tha tak—Stella tluk thuak a neih zui nghe nghe kha!
Kan nu thianpa nupui neih nite pawh chuan kan nupain kan tel ve a. Ruai te pawh kan kîl ve. Hlim takin hun kan hmang—a dera hlimin!
Häw tùra car kan luh rualin ze tak kan chhuah a. Boruak a uap churh a, a tâwt mup mai. Inbe miah loin in kan inkhalh thleng thak!
Inthlâk pahin Stella hnênah chuan, ‘Mipa dang an la awm em?’ ka ti chhuak kher! Ka duh loh ber zawhna a ni ka sawi chhuah ni!
Stella chu khumah a thu hnawk a. A hmélah chuan thinrim hmél emaw, ti tau hmél emaw ka hmu hran lo. Mahse, a hnu lawkah a mit atangin mittui a rawn luang ngiai ngiai mai.
‘Arthur, mipa dang maw?’ a rawn ti chhuak tiak a, ‘awm e!’
A lam ka hawi nghâl vat. “Tu nge?” tia zawhna zawh chi niin ka hre lo. Stella chuan sawi tùr a la nei tih ka hai tlat lo.
Zawi tê-in, ‘Stella…’ ka ti ringawt a.
‘Arthur, mipa dang chu ka nei tawh,’ a rawn ti chhuak a, ‘kum nga chhúng ka nei tawh.’
‘I sawi awmzia—’
Ring fiak thakin, ‘Arthur, i hriat duh tak chu ka sawi ang. Mipa dang—kawppui—ka nei tawh. Ka nuna ka thian mipaho rawn lan hma hian hmangaih ber chu ka nei tawh aläwm. Chu chu nangmah hi i ni,’ a ti ta mai!
A rawn tho chhuak a. Ka hma taka ding chungin, ‘Mahse maw Arthur, i thil sawi duh dàn hi ka hre thiam thei lo a ni! Zawhna. Inrinhlelhna. I thil ngaihtuah dàn zawng zawng. Kei hi i nupui ni mah ila, i hnenah chuan mi dang ka ni reng!’ min tih khum ta siah siah mai.
Sawi tùr neiin ka inhre ve lo—khami zàn kher kha chuan.
𝗛𝗮𝗹𝗳-𝘄𝗮𝘆 𝘂𝗽/𝗵𝗮𝗹𝗳-𝘄𝗮𝘆 𝗱𝗼𝘄𝗻
Ka tlai office báng chu hàw ka hreh tak zet. Ruah a la sùr reng avàngin thianpa Pára’n min thlah a. Ani hi kan office-a ka thianpa ber, ka mi rin ber, Stella nèna kan inkár boruak pik zet min hriatpuitu awm chhun a ni. Hàw kawng tluan chuan tawng ka tum lo. Ka tawng hman lo pawh a ni lo. Thu sawi tùr hi neiin ka inhre tawh tlat lo!
Pára chuan Stella chu chelh miah lo tùrin min hrilh mawlh mawlh. A thu sawi zawng zawng chu ka hre vek lo—ngaihsak hek lo ì! Ka hriat chhun erawh chu dik ka ti hle.
‘I nupui hian hna tha zâwk, kai sànna theihna chance a zawng reng a, a career leh a nun khaw nawm zâwkna—higher ground ûmin a tlän a; chu chu thlahlelin a tàmin a tám a ni. Khaw dangah pawh kal se, half-way up chauh a ni ang. Mahse, half-way up nun a tawn rualin a half-way down ve nghâl tho ang! A chhan chu, in kum nga nun—in khum nun thlengin—duhawm tak leh ngaihawm êm êm zawng zawngte kha a hloh ve nghâl vek dáwn tho a,’ tia a sawi hi a ni.
𝗦𝘁𝗲𝗹𝗹𝗮, 𝘁𝗵𝗶𝗻𝗸 𝘁𝘄𝗶𝗰𝗲!
In ka thlen chuan Stella chu inah a lo awm reng tawh a. Boruak chu a uapin a rit nghâl churh mai. Pindanah ka lût tlang a. Ka duh lo tak mai ka hmu—a suitcase lo in-pack fel diam tawh chu!
Pindanah chuan ngawi rengin a rawn lût a. Khuma thua pheikhawk ka phelh lai chu dahin ka nupui Stella chu ka en reng a. ‘Duati…’ ka ti ve ta a.
Min rawn en a. Min chháng lo! A mit mengah chuan hmangaihna—thla ral lam ang riaia fiah loa hla taka êng de vé vé ve chauh ang hi hmuin ka inhria.
Vawi khat leh chiah ka chhui nawn leh thuak a—kan nun kha. Nula ngai ngäi lo, ’vál senior lam tawhin lungawina ka hmuh chhun a nihzia te; kan inneih ní leh a zàna kan hlim dunzia te; engkim—kan thil neih, kan taksa leh kan rilru kan intâwm vek thinzia te; “Fa nei rih lo mah ila, kan hlim tho a—pawi hleinêm ti raw?” a tih fozia te kha! Tünah erawh, engkim a danglam ta!
“𝘚𝘵𝘦𝘭𝘭𝘢, 𝘯𝘢𝘯𝘨𝘮𝘢 𝘯𝘶𝘯 𝘤𝘩𝘢𝘶𝘩 𝘯𝘨𝘢𝘪𝘩𝘵𝘶𝘢𝘩 𝘭𝘰𝘪𝘯 𝘬𝘢𝘯 𝘱𝘢𝘩𝘯𝘪𝘩𝘢 𝘪𝘯𝘬á𝘳 𝘩𝘪 𝘥á𝘸𝘯 𝘵𝘦𝘩 𝘬𝘩𝘢𝘪. 𝘐 𝘬𝘢𝘭 𝘩𝘮𝘢𝘪𝘯 𝘯𝘢𝘯𝘨 𝘯è𝘯𝘢 𝘬𝘢𝘯 𝘯𝘶𝘯 𝘬𝘩𝘢—𝘯𝘪𝘩𝘭𝘪𝘢𝘱 𝘱â𝘸𝘭 𝘬𝘢𝘯 𝘪𝘯𝘻𝘢𝘸𝘯 𝘵𝘭𝘢𝘪 𝘢t𝘢𝘯𝘨 𝘬𝘩á𝘯 𝘩𝘢𝘯 𝘤𝘩𝘩𝘶𝘪 𝘯𝘢𝘸𝘯 𝘭𝘦𝘩 𝘭𝘢𝘸𝘬 𝘵𝘦𝘩. 𝘛𝘪 𝘤𝘩𝘶𝘢𝘯, 𝘵ü𝘯𝘢 𝘪 𝘴𝘢𝘸𝘪 𝘵𝘶𝘮 𝘱𝘢𝘸𝘩 𝘩𝘪 𝘪 𝘴𝘢𝘸𝘪 𝘭𝘰 𝘵𝘩𝘦𝘪 𝘮𝘢𝘪 𝘢𝘯𝘨! 𝘔𝘪𝘯 𝘭𝘪𝘢𝘮𝘴𝘢𝘯 𝘮𝘢𝘪 𝘵ù𝘳 𝘩𝘪, 𝘪 𝘵𝘪𝘢𝘮𝘪𝘯 𝘪 𝘤𝘩𝘪𝘢𝘯𝘨 𝘮𝘦𝘶𝘩 𝘮𝘢𝘸, 𝘋𝘶𝘢𝘵𝘪?” tia a hmaa tah hawm hawm chu ka va duh tak! Mahse, thianpa Pára thu min chah kha ka hre chhuak zawk a.
Parcel-a a pheikhawk a khung malh malh lai chuan, ‘Duati, dáwn nawn teh!’ ka ti leh hräm. Chu chauh chu ka sawi.
Ka dáwn nawn tawh!’ tih zawng a ni, chhànna ka dawn chhun chu!
Ruah chu a la súr reng a. Chu zan thim, chhüm chhah mup kárah chuan Duati chuan, kei leh a làwina rún chu a chhuahsan ta a! Mipa mittui a ni, a hnutchhiah tlawng ni!
𝙏𝙝𝙞𝙣𝙠 𝙏𝙬𝙞𝙘𝙚
𝙋𝙚𝙧𝙛𝙤𝙧𝙢𝙚𝙙 𝙗𝙮 𝘾𝙚𝙡𝙞𝙣𝙚 𝘿𝙞𝙤𝙣
𝘋𝘰𝘯’𝘵 𝘵𝘩𝘪𝘯𝘬 𝘐 𝘤𝘢𝘯’𝘵 𝘧𝘦𝘦𝘭 𝘵𝘩𝘢𝘵 𝘵𝘩𝘦𝘳𝘦’𝘴 𝘴𝘰𝘮𝘦𝘵𝘩𝘪𝘯𝘨 𝘸𝘳𝘰𝘯𝘨
𝘠𝘰𝘶’𝘷𝘦 𝘣𝘦𝘦𝘯 𝘵𝘩𝘦 𝘴𝘸𝘦𝘦𝘵𝘦𝘴𝘵 𝘱𝘢𝘳𝘵 𝘰𝘧 𝘮𝘺 𝘭𝘪𝘧𝘦 𝘧𝘰𝘳 𝘴𝘰 𝘭𝘰𝘯𝘨
𝘐 𝘭𝘰𝘰𝘬 𝘪𝘯 𝘺𝘰𝘶𝘳 𝘦𝘺𝘦𝘴, 𝘵𝘩𝘦𝘳𝘦’𝘴 𝘢 𝘥𝘪𝘴𝘵𝘢𝘯𝘵 𝘭𝘪𝘨𝘩𝘵
𝘈𝘯𝘥 𝘺𝘰𝘶 𝘢𝘯𝘥 𝘐 𝘬𝘯𝘰𝘸 𝘵𝘩𝘦𝘳𝘦’𝘭𝘭 𝘣𝘦 𝘢 𝘴𝘵𝘰𝘳𝘮 𝘵𝘰𝘯𝘪𝘨𝘩𝘵.
𝘛𝘩𝘪𝘴 𝘪𝘴 𝘨𝘦𝘵𝘵𝘪𝘯𝘨 𝘴𝘦𝘳𝘪𝘰𝘶𝘴
𝘈𝘳𝘦 𝘺𝘰𝘶 𝘵𝘩𝘪𝘯𝘬𝘪𝘯𝘨 ’𝘣𝘰𝘶𝘵 𝘺𝘰𝘶 𝘰𝘳 𝘶𝘴?
𝘋𝘰𝘯’𝘵 𝘴𝘢𝘺 𝘸𝘩𝘢𝘵 𝘺𝘰𝘶’𝘳𝘦 𝘢𝘣𝘰𝘶𝘵 𝘵𝘰 𝘴𝘢𝘺
𝘓𝘰𝘰𝘬 𝘣𝘢𝘤𝘬 𝘣𝘦𝘧𝘰𝘳𝘦 𝘺𝘰𝘶 𝘭𝘦𝘢𝘷𝘦 𝘮𝘺 𝘭𝘪𝘧𝘦
𝘉𝘦 𝘴𝘶𝘳𝘦 𝘣𝘦𝘧𝘰𝘳𝘦 𝘺𝘰𝘶 𝘤𝘭𝘰𝘴𝘦 𝘵𝘩𝘢𝘵 𝘥𝘰𝘰𝘳
𝘉𝘦𝘧𝘰𝘳𝘦 𝘺𝘰𝘶 𝘳𝘰𝘭𝘭 𝘵𝘩𝘰𝘴𝘦 𝘥𝘪𝘤𝘦
𝘉𝘢𝘣𝘺, 𝘵𝘩𝘪𝘯𝘬 𝘵𝘸𝘪𝘤𝘦.
𝘉𝘢𝘣𝘺, 𝘵𝘩𝘪𝘯𝘬 𝘵𝘸𝘪𝘤𝘦 𝘧𝘰𝘳 𝘵𝘩𝘦 𝘴𝘢𝘬𝘦 𝘰𝘧 𝘰𝘶𝘳 𝘭𝘰𝘷𝘦, 𝘧𝘰𝘳 𝘵𝘩𝘦 𝘮𝘦𝘮𝘰𝘳𝘺
𝘍𝘰𝘳 𝘵𝘩𝘦 𝘧𝘪𝘳𝘦 𝘢𝘯𝘥 𝘵𝘩𝘦 𝘧𝘢𝘪𝘵𝘩 𝘵𝘩𝘢𝘵 𝘸𝘢𝘴 𝘺𝘰𝘶 𝘢𝘯𝘥 𝘮𝘦
𝘉𝘢𝘣𝘦, 𝘐 𝘬𝘯𝘰𝘸 𝘪𝘵 𝘢𝘪𝘯’𝘵 𝘦𝘢𝘴𝘺 𝘸𝘩𝘦𝘯 𝘺𝘰𝘶𝘳 𝘴𝘰𝘶𝘭 𝘤𝘳𝘪𝘦𝘴 𝘰𝘶𝘵 𝘧𝘰𝘳 𝘢 𝘩𝘪𝘨𝘩𝘦𝘳 𝘨𝘳𝘰𝘶𝘯𝘥
’𝘊𝘢𝘶𝘴𝘦 𝘸𝘩𝘦𝘯 𝘺𝘰𝘶’𝘳𝘦 𝘩𝘢𝘭𝘧-𝘸𝘢𝘺 𝘶𝘱, 𝘺𝘰𝘶’𝘳𝘦 𝘢𝘭𝘸𝘢𝘺𝘴 𝘩𝘢𝘭𝘧-𝘸𝘢𝘺 𝘥𝘰𝘸𝘯.