Sudan-a sipaite chuan drone hmangin mi 300 chuang an that nia sawi a ni a, heng zinga tam tak hi mitthi vuia kalte an ni nghe nghe.
Kum 2023 atanga sipai leh paramilitary Rapid Support Forces (RSF) inkara buaina chhuak thlithlaitu, Sudan War Observatory chuan Pathianni zana West Kordofan state hmun hnih beihnaah mi 150 an thi niin an sawi.
Sudan leh South Sudan inrina ram buai lai, Abyei-ah drone-in Thawhtannia bazar a fuhah mi 153 an thi bawk tih region information minister-in a sawi bawk a. Bazar hi RSF-ten tuialhthei an lakna hmunpui niin an sawi.
Beihna hian Abyei awptu pahnih, South Sudan leh Sudan inkarah neuh neuh a siam phah a. Kum 2011-a South Sudan a pian atang khan ram pahnihte hian tuialhthei tamna hmun hi neitu zawk niin an inchhal ve ve a ni.
South Sudan chuan Sudan palai a ko nghal a, buaina hian ramri a pel ang tih hlauhna a awm nghal.
Khawvela mihring dinhmun hniamna ber ramah hian indona avangin mi sang tel an thi tawh a, mi maktaduai 14 chuang baihvaiin an awm.
“Ram hmun hrang hrangah drone hmanga naupang tela civil mi thahna a thleng reng hi a buaithlak a, ni tin khawsak a tibuai hle,” tiin UN thupuangtu, Stéphane Dujarric-a chuan a sawi.
Sudan-ah hian maktaduai 20 vel tamin an awm mek a, khawthlang lama Darfur leh Greater Kordofan-ah chuan tam a tla mai dawn niin Dujarric-a chuan a sawi.
Sudan War Observatory chuan Pathiannia drone hmanga beihna hi sipaiten an luah, South Kordofan state-a Kadugli khawpui atanga kah niin an sawi.
Mitthi vuinaa kal tur mi 200 vel phur truck, Abyei hmar lam atanga chhuakin West Kordofan-a Al-Dabab a thlen chiahin a fuh tih an sawi.
Mi 145 an thi a, puan ina mitthi vuina hmuna awm mi panga an thi tel bawk tih an sawi a. Mi 150 velin hliam an tuar bawk tih an sawi.
Hemi tlai hian army thlawhtir drone-in West Kordofan-a Al-Mujlad khuaa bazar a fuh niin Sudan War Observatory chuan a sawi bawk a, thi leh hliam zat tak erawh an sawi lo.
Sipaite chuan heng beihna titua puhna an la chhang lo va, civil mi an bei ngai lo tih an sawi tawh thin thung.
West Kordofan ramri bul, Abyei beihna hi khua atanga km 10 vela hla, Amiet Market bitum niin Thawhtanni chawhma dar 11:30 (India-a tlai dar 03:00) vela thleng a ni tih region Information Minister Yohana Akol Ngor-a chuan Radio Tamazuj a hrilh.
Minister hian Thawhlehni khan thi hi 73 atangin 153-ah an kai tawh tih Associated Press leh Reuters a hrilh bawk.