Home Minister leh Aizawl North III bialtu MLA K. Sapdanga chuan Ningani chawhnu khan a bial chhunga Electric Veng Local Council House sak thar a hawng a, he hunah hian khawtlang hruaitute leh NGO hrang hrang hotute an tel.
MUP House-a hawnna hun hi Samuel Vanlalpeka, Local Council Chairman-in a kaihruai a, Pastor H. Lalawmpuia, Electric Presbyterian Kohhran bialtu chuan hunserh hmangin building thar hi Pathian hnenah a hlan a ni.
Local Council House sak nan hian Social Welfare Department atanga sum hmuh hmangin a bul tan a ni a, Local Council member lo ni tawh te, Sainguri Sailo leh AMC Corporator lo ni tawh Rosiamngheta ten sum an thawh bawk. Chumi hnuah bialtu MLA K. Sapdanga fund atangin tum thum puihna an hmuh bawk avangin puitlin a ni ta a ni.
Home Minister K. Sapdanga chuan thusawiin, Electric Veng chu Aizawl veng zinga veng ropui leh khawtlang infinkhawmna tha tak nei an nih thu a sawi a, faina chungchangah leh thil tha zawng zawnga record siamtu veng an ni thei hi a chhuanawm hle a ni, a ti.
Bialtu MLA chuan ruihhlo do kawngah leh khawtlang hmasawnna atan NGO-te leh local council-te thawhpuina a pawimawh thu sawiin, Aizawl North III bial chu Model Constituency a nih teuh tawh thu leh sorkar puihna kawnga thahnemngai chhunzawm zel turin mipui a chah bawk.
Inkhawmah hian Vanlalduha, Local Council Vice Chairman-in building sak dan report a pe a, Dr. Lallawmkimi Tochhawng, Corporator Ward No. V leh YMA, MUP leh MHIP hruaituten he hun hi hmanpuiin thu an sawi.