Aizawl: AH & Vety Minister C. Lalsawivunga chuan Thenzawla Mega Egg Project hnathawh kal mek a hmunah tlawhin, he project hi puitlin a nih chuan Mizoramin ni tin artui 70,000 atanga 89,000 thar chhuah a beisei thu leh he hmalakna hian state economy dinhmun thlengin a tidanglam pha hial dawn tih Ningani khan a sawi.
Minister hian Thenzawla Mega Egg Project bakah AH & Vety Department-in ranchaw chinna hmun a neih Dilpui leh a zauhna tur kawng leidawh hna kal mekte a tlawh a. Mizoramin kum khatah artui nuai 397 vel chauh thar chhuakin, mi pakhat tan kum khatah artui 29 chauh a daih tih sawiin, Vairengte kaltlangin ni tin artui 70,000 vel ram chhungah lak luh a nih avangin kum khatah Rs. vbc 16 chuang sen ral a ni a. Chuvangin, ram chhungah artui thar tam zawk mamawh a nih rualin, a hralhna market-ah harsatna a awm lohzia a lan thu leh tuna project hna hi zaa 55 zawh a nih tawh thu a sawi bawk.
Serchhip district chhunga Vety Farm Complex, Thenzawla project din mek atan hian NABARD RIDF-XXX hnuaiah Rs. vbc 20.64 ruahman a ni a, ar tui tam chi (Poultry Layer) nuai khat vulh theihna tura duan a ni. He project tum ber hi Mizoram chhungah artui thar leh hrisel zawk thar chhuah a, state pawn atanga lak luh tihhniam a ni.
Minister chuan ran chaw (Animal Feed Plant) atan Rs. vbc 10 dah a nih thu leh, ranchaw intodelh an mamawh avangin Mizoram hmun laili Thenzawlah ranchaw chinna hmun thar ruahman mek a nih thu a sawi bawk.