Aizawl: Chief Minister Lalduhoma’n Ningani khan Champhai district chhunga Hnahlan Darnam venga Tribal Affairs fund Rs. nuai 75 hmanga sak Multi Purpose Hall a hawng a, he hall thar lawmna inkhawm hi Hnahlan Community Hall-ah neih a ni.
Hawnna inkhawmah Chief Minister chuan hall hawn thar tual chu leivut a la nih avangin a tual PCC-na tur Rs. nuai 4 pek a tiam a, hei bakah Hnahlan High School leh Higher Secondary School zirlaite hostel sak nan Rs. nuai 50 pek an tum thu a sawi a. Mizorama Eklavya Residential School sak mekte zawh a nih a, a dang hmuh a nih leh chuan Hnahlan-a dah a tum thu a sawi bawk.
He hunah hian bialtu MLA Er. H. Ginzalala pawhin thu a sawi bawk.
Inkhawm zawh hian Chief Minister chuan Vanlalpari vawk vulhna hmun HH Piggery a tlawh nghal a. Vanlalpari hian Handholding Loan Component Rs. nuai 25 Mizoram Rural Bank kaltlanga an hmuh avanga lawmthu sawi nan Chief Minister Relief Fund (CMRF) atan a vawk vulh lai pakhat a lo hlan a. A vawk a hralh hunah a man zawng zawng CMRF-ah hian a chhunglut dawn a ni.
Tlai lamah Chief Minister hian Hnahlan Winery a tlawh chhunzawm bawk.