Guwahati-a cham mek Food, Civil Supplies & Consumer Affairs Minister B. Lalchhanzova chuan Mizoramin tuialhtheih dahkhawlna oil depot a neih ngei theih nana hmalakna chhunzawmin, Ningani khan Guwahati-a Mizoram House-ah HPCL hotute a kawm.
An inkawmnaah B. Lalchhanzova chuan Mizoram chu tlang leh suarin a bawm vel ram, inkalpawhna harsatna ram a nih vangin India ram state dangte anga hmasawnna kawngah a hnufual hle rih tih a sawi a. Oil company-te chu sumdawnna leh hlawkna ringawt thlir lo vin, Mizoram mamawh tihsak chu an company tana malsawm dawnna tur a nih thu a sawi a, chhim lam sumdawnna inhawng mek enin chhim lamah pawh oil depot dang hawn belh dan thlithlai tel turin HPCL hotute hi a chah a ni. Ram himna en tel pawhin Mizoramin a rang lama oil depot a neih chu tihmakmawh a nih thu a sawi bawk.
Oil depot hi Mizoram hmar lamah ram acre 5 vela zau zawng tura ruahman a ni a, kumin chhung ngeia en hoa tihfel a duhna thu Minister hian HPCL hotute hi a hrilh a. Chief Minister remtihna anga oil company-te hnenah oil depot siamna tur hmunhma hi man awm lova pek a nih dawn bawk a. Mizoram sorkar hian HPCL bakah IOCL lam nen pawh indawrna hi a kalpui mek bawk.
An inkawmnaah hian HPCL aiawhin Gurubachan Singha, General Manager (Operations), Rahul Kumar Singh, CRM, leh Ratul Bora, DGM-te an tel a, Minister B. Lalchhanzova hi Dr. Saithangpuia, DRC, Mizoram House-in a tawiawm a ni.
An inkawm zawh hian Minister hian Betkuchi-a HPCL oil depot a tlawh nghal bawk.
Mizoramin oil depot a neih theih nan hian Minister B. Lalchhanzova hian July ni 12, 2024 khan Kolkata-a HPCL Oil Terminal a lo tlawh tawh a, indawrna hmasate kalpui a nih hnuah tunah hian North East Zone hmunpui Guwahati lamah hian a bawhzui zui zel a ni.