Aizawl: MNF President Zoramthanga chuan, “ZPM chu pui hrang hrang nei awm khawm, hram dan pawh chi hrang hrang nei an ni a, an lungrual hleithei thei lo va. an chet dan pawh a hmuhnawm tan viau,” a ti.
Ningani khan Mizoram hmun hrang hrangah MNF din champha vawi 65-na lawm a ni a, a hmanna pui ber MNF Hnam Run, Aizawla buatsaihah Zoramthanga chuan thu sawiin, MNF chu mihring ngaiha mi tlawm tak takte din leh bul tan ni mah se, hotu hmasaten Pathian hming lam chunga Mizo hnam thuthlung chi an lo tuh chu thi lova thang duangin, Mizorama political party lian ber leh nghet ber a nih tak zel thu a sawi a. Beihna leh nekbehna nasa tak karah pawh party innghahna ‘Pathian leh kan ram tan’ tih thupuia vawntute chu Pathianin a tungding leh thin tiin, he thuthlung hi MNF chakna thuruk a nih thu a sawi.
Zoramthanga chuan tuna sorkar mek ZPM chungchang pawh sawiin, movement wave na tak nena sorkarna chang an ni chungin, pawl hrang hrang awmkhawm, pui hrang hrang leh hram dan pawh chi hrang hrang nei an nih avangin an lungrual hleithei lo va, an chet dan pawh a hmuhnawm tan viau a ni, a ti.
He ni pual hian ram leh hnam tana martar-te sun nan minute khat chhung ngawi rengin an ding a, MNYF Headquarters bultumin MNF Hnam Run pisa-ah a mamawhte tana hman tur ‘blood donation’ neih a ni bawk.
MNF din cham hi Vice President D. Thangliana’n Hnahthial-ah, Kolasib-ah F. Aithanga, NCC, Champhai North-ah C. Larammawia, PAC, Mamit-ah Adviser Er. H. Lalzirliana MLA leh Lungleiah T. J. Lalnuntluanga, PAC te’n an hmanpui a ni.