Aizawl: India-a Living Museum hmasa ber leh awm chhun, Zokhua, Falkawn chu kum khat chhungin mi 9,600 chuangin an tlawh tawh.
Art & Culture department-in Zokhua (Mizo Typical Village), Falkawn-a chawlhkar tin Inrinni apianga an buatsaih thin Living Museum chuan kum khat tlingin, Inrinni khan I&PR Director Mina Zoliani Joute, Art & Culture Deputy Secretary Lalengvari leh official dang ten an tlawh.
Living Museum kum khat tlin pual hian cake zaina hun hman a ni a. Tourist helai hmun tlawhtute pawh a lawmna hun tawi buatsaihah hian an tel a ni.
Living Museum hi ram chhung leh ram pawn atanga lo kal te ngaihhlut a hlawh hle a, a bikin ram pawn tourist-te hian an tlawh nasa lehzual a ni. Tun thlengin Living Museum tlawhtu hi mi 9,600 a chuang tawh a, an zinga a zatve zel hi ram pawn atanga Mizoram tlawhtu tourist-te an ni.
He Living Museum neihna Zokhua, Falkawn hi kum 1992-a din fel niin, hmanlai Mizo khua anga siam leh cheibawl a ni a. Thangthar leh naupang zawkten Mizo nun ze mawi a tak ngeia an hmuh leh tem chhin theih nan te, zirlai naupangte tangkai taka an zirlaibu awmte an hriatthiam lehzual nan te, leh khualzin lo pung zel ten Mizo hnam nun an hmuhfiah theihna turin Art & Culture department chuan October ni 25, 2025 atang khan chawlhkar tin Inrinni apiangin hun hnihah thenin, first show chu chawhma 11 atanga chhun dar 1 thleng leh second show chu chhun dar 1:30 atanga chawhnu dar 3:30 thleng neih thin Living Museum hi a buatsaih thin a ni.
Living Museum-ah hian hmanlai Mizo nun, hnam lam leh hla, tualchhuak infiamna, pipute chaw hmeh leh thuamhnaw hrang hrangte entir thin a ni a, Mizo hnam thuamte pawh man chawia hak hawh theih a chhawp chhuah a ni.