Aizawl: Enforcement Directorate (ED), Narcotics Control Bureau (NCB) leh state police te thawhhona hmangin Myanmar atanga Mizoram tela hmarchhak state-te kal tlanga ruihhlo hmanga sumdawnna leh heta tanga pawisa thianghlim lo chet kualna (money laundering) lian tham tak chu chhui chhuah a ni.
ED leh NCB-te chuan Zirtawpni khan hmarchhak state pathum — Assam, Mizoram leh Manipur-a hmun 38-ah ‘Operation Trident’ tiin state pathum police-te nen a rualin ruihhlo hmanga sumdawng pawl liante dapin beihpui an thlak a. Hetah hian hawala hmanga sum che kual vel Rs vbc 100 man chhuah a ni a, bank account 1,424 tihtawp (freeze) niin Rs vbc 17.82 hlutna ro leh thil neih chhuhsak (attach) a ni.
Tual chhung leh ram pawn inzawmna nei ruihhlo zungpui beihnaah hian mi 18 man an ni a, an man zingah Champhai lam mi pasarih vel an tel nia thudawn a ni a. Champhai Zion Veng-a Lalliansanga hminga awm, ‘HOTEL JTS’ pawh hren zingah a tel.
ED chuan Lalliansanga leh a nupui, Lalrampari te bank account-ah ram chhung hmun hrang hrang atanga ruihhlo hralhna pawisa, Burma pawisaa thleng turin India pawisa Rs vbc 268.80 a lut tih a hmu chhuak a, heng atang hian Rs vbc 125 chu a sum faiin an dawng tih hriat a ni bawk.
Anni hian Myanmar leh ram chhung hmun danga ruihhlo hmanga sumdawngte pawisa chet velna buaipuiin he sum dawn khawm atang hian in leh lo, Hotel JTS leh sumdawnna hmun dangte an din niin ED chuan a tar lang.
Chhui zuina hi tun hnaia ruihhlo man lian tak tak pathum — nikum March thlaa Heroin kg 4.722 (hawng 440) manna, nikum August thlaa Seling daia methamphetamine kg 49.101 manna leh kumin July thlaa Manipur Police-in Churachandpur-a brown sugar kg 2.413 an man chungchang ED-in thubuai puitlinga a chhui zawm hnu atanga thleng a ni.
Social media platform X-a a thuchhuah siamah Home Minister Amit Shah chuan he ruihhlo hmanga sumdawng pawl lian hian India, Myanmar leh Bangladesh inkarah ‘Death Triangle Corridor’ hmangin ruihhlo an tawlh thin thu a sawi a. Operation Trident hlawhtling tak a thlen theih chhan hi central agency-te leh state pathum police-te thawhhona tha tak avangin a ni tiin lawmthu a sawi.
Shah-a chuan he operation hi sorkar laipuiin December 31, 2029 thlenga ram chhunga ruihhlo zungpui zawng zawng tichimit tumna (Nasha Mukt Bharat roadmap) peng pakhatah a pawimawh hle tiin a sawi.