Aizawl: UD&PA Minister K. Sapdanga chuan Treasury Square leh Bungkawn inkar kawngpui chu a zim lai berah meter 14-a laih zauh tur niin, Dak Inpui atanga liamin Saron Veng Baptist biak in bula chhuak tur kawngpui tlang duan a nih thu leh he ruahmanna hnuaia biak in leh mi mal dawr thiah ngai Dawrpui pahote nen inremsiamna tha tak an neih tawh thu a sawi.
Thawhtannia ZPM party chhung inkhawmah AR ram chhuahsan tak, Lammual-a sorkarin kut a thlak mek dan sawiin K Sapdanga chuan, Lammuala sipai damdawi in tlang leh thing hlu tak takte chu zuah hram hram tur niin he hmun hi ‘Aizawl Square’ tih a ni dawn a, sipai canteen thinah lirthei ke pali nei 300 leh two-wheeler thahnem tak leng tur parking chhawng thum siam a nih bakah, AR Cinema Hall thinah mi 2,000 leh mi 600 lenna hall pahnih sak ruahman a nih thu a sawi a. Mandir awmna hmun chu kawng zauhna atan hmangin mandir sawn a ni ang a, chumi zawna tlang bawkah chuan PHE lamin Aizawl chawmtu tur tuizem leiah phumin a chung zawn atanga Lammual inkhel enna nuam tak siam a nih tur thu a sawi,
Quarter Guard leh sapho kutchhuak inte chu thiah lovin chei that a ni ang a, Heritage Centre leh Exhibition neihna atan humhalh zui a ni ang. Inkhel en hunah traffic jam pumpelh tur leh sports department-in khelmual chei thatna sum a buaipui mek bakah amphitheatre leh parking lian tak tak hmun thumah siam belh a ni dawn tih a sawi bawk.