Mizo Writers Association chuan Lehkhabu Pho Runpui thawh rukna hmang zoin, hetah hian an sumchhuah pawh kum dang aiin a tam fe tawh niin an sawi a, hmasawnna tha tak a ni.
Lehkhabu hralh tam hrim hrim a ni leh ta tih hriat ringawt pawh hi lawmna tling a ni a, lei an awm chuan chhiar an awm dawn tih a hriat avangin tuna LPR-6 an buatsaih atang hian kan hnam dinhmun thui tak a lang ruak ni pawhin a lang.
Lehkhabu chhiar tam hi a hlu a, hmasawnna a ni a, khawvel hmasawnna sang zel leh social media in nasa taka min luhchhuah tawh kara chhiar tur mihring kan la awm hi a lawmawmin, kan hnam hi a la tluchhe lo tih pawh a hriat theih ruak awm e.
Khawvel ram changkang leh hmasawn kan tih tam takte hian an ziak a, an chhiar a, tunlaina hi an dah tha thiam a, a huna hman an thiam mai thin tih hre thar ila; lehkhabu ziaktu kan la nei leh chhiar tur mipui kan la awm a, lehkhabu mana pawisa thehchhuah kan la hreh lo hi kan hnam hian kawng engemaw tal chuan hmasawn nan a hmang ngeiin a rinawm a, rah tha chhuah zel mawlh bawk teh se.
Lehkhabu Pho Runpui pawh hi hlut chhoh leh neih chhoh zel ni thei sela, kum khatah vawikhat aia tam neih dan pawh a buatsaihtu lam hian ngaihtuah thei se la, lehkhabu zuar dawr leh akchhuak ho pawhin dawrtu nei tam telh telh se la, mizote hian lehkhabu chhiar leh lei kawngah thangharhna dar i vaw chho zel ang u.