Aizawl: Mizoram Journalists’ Association (MJA), Serchhip district chuan an member-te tan Artificial Intelligence (AI) chungchang zirna Thawhlehni khan a buatsaih a, Serchhip District Deputy Commissioner Paul L. Khuma’n a hmanpui.
Bawrhsap Paul L. Khuma chuan Serchhip District MJA-ten AI chungchang training buatsaih nachang an hria chu changkang a tih thu sawiin, thil dangah pawh hetianga hma sawnna thil tha hi um zel turin a chah a; khawvel changkanna mil zela finna pawh kan lakluh ve zel a ngai tih sawiin, intuai thar zel turin MJA member te a chah.
He hun hmanpuitu DIPRO R.Vanneihtluanga pawhin thu sawiin, media mite chu democracy innghahna lungphum, mipuite hriatna kawnga thuam chaktute an nih thu a sawi a; huaisenna leh dikna nena hna thawk a, thu dik leh rintlak theh darh kawnga tan la zui zel turin MJA member-te chu duhsakna a hlan bawk.
Resource person Adam Saprinsanga, Editor, The Frontier Despatch chuan chanchin thar buatsaih nana AI leh online-a hmanraw dang hrang hrang hman dante, AI rindan chintawk neih thiam dante leh tunlai technology mila hnathawh theih dan hrang hrang a zirtir a, zawhna leh chhanna hun hman a ni.