Aizawl: Kum 2025 chhunga Mizorama thih chhan langsar zual zingah, thawk lama harsatna leh a kaihhnawih natna a tam.
Chief Registrar of Births & Deaths-cum-Commissioner & Secretary Vanlaldina Fanai chuan Directorate of Economics & Statistics Conference Hall, MINECO-ah Thawhlehni khan Directorate of Economics & Statistics buatsaih ‘Annual Report of Births & Deaths, 2025’ leh ‘Medical Certification of Causes of Deaths (MCCD), 2025’ te chu khuallian niin a tlangzarh.
Tun tuma a vawi 40-na tana tihchhuah Annual Report of Births & Deaths 2025 bu-ah hian kum 2025 chhunga Mizorama nau piang leh mitthi register zawng zawng tar lan niin, a vawi 21-na tana tihchhuah MCCD Report 2025 bu-ah hian Mizoram chhunga damdawi in bika mitthi ziah luh zat leh an thih chhante kimchang tak tar lan a ni bawk.
He report-in a tar lan danin, kum 2025 chhunga Mizorama thih chhan langsar zual zingah thawk lama harsatna leh a kaihhnawih natna (Disease of the Respiratory system) zaa 17.3 leh, pumpui leh a kaihhnawih natna (Disease of the Digestive System) zaa 15 te chu a hluar zual an ni.