Chief Minister Lalduhoma chuan sorkarin tawngka ringawtin eirukna a do lo va, kalphung tha zawk leh thar duang chhuakin a takin a do mek thu a sawi.
Nilaini khan khuallian nia Vana Pa Hall-a Vigilance Awareness Week 2026 a hmanpuinaah chief minister chuan eiruk theihna hmun leh a pawp laite thawm tha turin sorkarin hma a lak nasat thu a sawi a, aikal lak tihtawp a nih bakah sorkar hnathawkten hun an vawn dik leh zual nan biometric attendance system hman a nih thu a sawi.
Eirukna chhui hna chak zawka a kal theih nan CBI hnenah general consent pek a nih tawh thu sawiin Lok Ayukta leh Anti-Corruption Bureau (ACB) pawh thuam that leh tihchak an ni a, advertisement tel lo va sorkar hna lak a awm tawh loh bakah qualify lo tumah lak an awm tawh lo tih a sawi.
Lalduhoma chuan contract leh project thawh dan hrang hrang siam that a nih thu sawiin, “Contract agreement fel lo leh sorkar chan chhe sa reng reng phal a ni tawh lo va, project-te centralized niin, project inthuah leh hman zui tlak loh thawh thin pawh tihtawp a ni a, integrity pact uar thar a nih bakah contract petu leh diltute inlaichinna hnai nei an nih phal a ni tawh lo a ni. Right to Public Services Act hnuaiah sorkar service tipungin official-te biak that kher ngai lovin hun tiam chhungin hna an thawk tawh zawk a, mipuite zualko zung zungna tur online portal ‘Mipui Aw’ hmangin zualkona lo lut te a zangkhai zawka chin fel nghal a ni zel bawk,” a ti.
Tunhma aia buhfai buk a lo dik that tak dan leh dik lo taka Non-Practising Allowance (NPA) la doctor-te zawng chhuakin, dan kalha family pension late chu mahni duh thua in-surrender tura tih an nih hnuah mi tam tak an in-surrender avangin sorkar sum tam tak hum a nih thu a sawi a, he kalphung hi lirthei chhiah pe lo te lakah pawh hman chhunzawm sorkarin a rilruk mek thu a sawi bawk.
Chief minister chuan corruption laka fihlim a nih chuan ramin hma a sawn ngei dawn avangin officer-te chu fihlim taka awm tura chahin, ram mipuite pawh eirukna hnawl ngam tur leh dik lo taka sum lakluh hmanga thawmhnaw leh bungrua te duh lo ngam turin a chah a ni.