Mizo Zirlai Pawl (MZP) chuan October 27 khan Zirlaite Ni hmangin, MZP kum 90 tlin lawmna an hman kharna an nei bawk a, heta thusawitu Minister Dr. Vanlalthlana chuan zirlaite chu zoram hmabak an nih thu sawiin, danglamna siamtu an nih thu a sawi a ni.
MZP hian kawng tam takin kan ram leh hnam tan hna a lo thawk tawh thin a, pawl an nih miau avangin hruaitu pawh mi chi hrang hrang an lo awm tawh thin. A chang chuan ram pum huapa han invawrh kan chang an nei a, hniama sel an tawrh hun lai pawh a awm bawk.
Mahse, thil tha tam tak an lo ti tawh thin a, kan ram tan hian zirlai pawl a din zel hi a tulna a la awm reng a, zirlaite hmakhawsialtu, hmathlir dik neihtir theitu an ni tih pawh an inhriatthar zel a tul hle.
Minister sawi ang hian zirlaite hi zoram hmabak, engkim zir chho tur an nih miau avangin kan ram leh hnam hi an kutah thui tak a innghat a, ngaihtuahna dik, rilru dik leh tum mumal tak nei chunga ke an pen thiam a tul hle bawk.
Heng zawng zawngte hi zirlai pawlte chuan an ngaihtuah kim tur a ni a, hruaituten an chhuahsan tawh dawn avanga mahni kailawn tur dap nan ringawta pawl hmang lovin, an kaihhruai zirlaite tan nasa zawkin ke pen se la, kan ram leh hnam hma hun thui tak hi an kutah a awm tih inhre reng bawk teh se.