Aizawl: Mizoram Urban Development Agency Limited (MUDAL), Public Works Department (PWD) leh Urban Development & Poverty Alleviation (UD&PA) hnuaia Aizawl khawpui hmasawnna hna hrang hrang thawh mekte chu UD&PA Minister K. Sapdanga chuan Thawhtanni khan a hmunah tlawhin a enfiah a, heng hmalakna tam zawkte hi a hun taka zawh fel hman a beisei thu a sawi.
Minister hian Hualngohmuna Solid Waste Management Centre tlawh hmasain, MUDAL hnuaia Venghnuai Community Recreation Centre, Zemabawk Playground leh Dawrpui New Market City Centre te a tlawh zui a, Zodin Multi Level Car Parking thlengin a hmunah an hmalaknate a endik a ni.
Heng project-te hi hmasawnna chak taka kalpui a ni a, Venghnuai Recreation Centre-ah hian Physical Progress zaa 92 thleng tawhin, Zemabawk Playground pawh Physical Progress zaa 93 thleng tawhin kumin December thla tawpa zawh hman beisei a ni a, Dawrpui City Centre sak mek pawh nakkum September thlaa zawh beisei niin, Zodin-a chhawng riat awmna lirthei 94 leng Multi Level Parking-ah pawh thawktute chuan zawh fel thuai an inbeisei thu Minister hi an hrilh a ni.
Minister K. Sapdanga hi UD&PA Commissioner & Secretary V. Lalsangliana, Addl. Secretary CC Lalchhuangkima, Joint Secretary Margaret Lalrinawmi Fanai leh Director Jacob Lalawmpuia te bakah department hotu dangte’n an tawiawm a ni.