Aizawl: Sports & Youth Services Minister Lalnghinglova Hmar chuan MINECO-a a pisa-ah Pradhan Mantri Kaushal Vikas Yojana (PMKVY-STT) hnuaia Sports Nutritionist leh Strength & Conditioning Coach training zir chhuakte hnenah certificate a hlan a, hei hi Mizo infiamna khawvel tana bung thar a nih thu a sawi.
Minister chuan Mizorama sports leh skill development kal kawp theih dan kawng an zawn thu sawiin, India ramin a pawmpui thiamna tak tak nei inelna khawvela an lo chhuak ta chu lawmawm a tih thu leh infiamna lama Mizoram hmathlir hlawhtlinna hmasa a nih thu a sawi.
“Vawiina zir chhuakte hi hmasawn zel in duh tih ka hmu a, hei hian min tilawm. Hmasawnna sang tak tak kan neih dawn hi chuan kan danglam a ngai tawh thin. Ti thei nia inchhal hi chu an tam a; mahse, certified erawh an tlem. Nangni chu India ramin a pawmpui thiamna tak tak nei in ni.” tiin training chhuakte a lawmpui.
Mizoram State Sports Council (MSSC) buatsaih he training hi PMKVY hnuaia a tum khatna atan buatsaih a ni a; Sports Nutritionist-ah mi pakua leh Strength & Conditioning Coach-ah mi 12 an zir chhuak a ni.
Sports Nutritionist training hi February 16 – June 24, 2026 chhunga kalpui niin, Strength & Conditioning Coach training hi March 3 – July 8, 2026 thleng neih a ni bawk.
He training zir chhuakte hi Skill India hnuaia certified vek an nih bakah an certificate hi India pum huapa pawm a ni a; MSSC hnuaiah certified coach anga ziah luh niin sorkar leh Empowering Mizoram Sports hmachhawp hrang hrangah mamawhna a awm hunah duhsak hmasak an ni dawn a ni.