Aizawl khawpui chhung kawng zim zia leh lirthei tam tawh zia kan sawi chamchi a, traffic police lam pawhin theihtawp chhuahin tan an la a, hun rei fe chhung chu lirthei tlandan pawh a mumal chho hle.
Mahse, tun hnai ni hnih khat liamta atang khan lirthei jam a thleng tam leh ta hle mai a, nilenga traffic jam tluan a awm leh ta fo mai. A tam zawk hi chu duty awm lohna hmuna lirthei parking fel loh vang niin a lang a, man atana duhawm deuh deuh an tam hle bawk.
Kan lirthei a hmun lova park hian nghawng thui tak a nei tih a chiang hle mai a, midang harsatna siamsaktu kan ni tih inhre miah lova kan duhna laia kan dah ringawt zel hi sim a hun tawh hle.
Tin, lirthei khalhtute pawhin kan duhna lai laia tlan leh dah mai lovin, midang ngaichang chunga kan tlan thiam a va tul thar em. Lirthei ke hnih nei khalhtute zingah midang intlarna kara inzeh ching kan awm leh zauh thinte hi sim a hun tawh hle. A mawi loh bakah, a hlauhawm hle tih kan hriat thar a tul a, a bik takin heti lam kawngah hian taxi ke hnih nei khalhtute leh hmeichhiate hi inzeh ching an tam hle niin a lang.
Kan traffic police te tang zual deuh se la, traffic jam nasa tireh turin theihtawp han chhuah leh deuh se, sorkar pawh hian an indaih lohna lai ngaihtuahpui chungin a tul angin thuam chak dan zawng thuai bawk teh se.