US midterm inthlanah eptu, Democratic Party chuan an rorelna in, US Congress-a in pahnih, House of Representatives leh Senate-ah thuneihna an chang dawn ta a. Inthlan result hi President Donald Trump-a kaihhruai Republican party sorkar kalphung leh thutlukna hrang hrang laka mipuite lungnih lohna lantirnaa ngaih a ni.
Thawhlehni (India-a zan lam)-a mipuiten vote an thlak zawh hnuah vote hi chhiar zui nghal a ni a, he chanchin ziah lai hian result kimchang hriat la ni lo mah se Democrate-te hian rorelna in hnihah hian tam zawk nihna an chang dawn tih a chiang tawh a ni.
House of Representatives-ah Democrat chuan seat tam zawk an lak avangin Hakeem Jeffries chu an ram chanchina mi hang speaker hmasa ber ni thei turin dinhmun pawimawh a luah dawn ta a ni.
Senate-ah pawh Democrat chuan chanchin lawmawm an nei a, tun hma atang tawha Republican-ho chakna leh len em emna thin, bial sarih ngawt chhuhsakin an candidate-ten hnehna an chang.
Chanchin danglam tak awmah Michigan-ah Democrat candidate, Abdul El-Sayed chuan hnehna changin US chanchina Muslim senator hmasa ber a ni dawn ta a. Texas-ah pawh kum 30 hnuah Democratic candidate James Talarico chuan hnehna a chang bawk.
State governor thar tur inthlannaah pawh politic hawiher tam tak a inthlak tih result atangin a lang a. Georgia-ah Keisha Lance Bottoms chu tlingin mi hang hmeichhe zinga governor hmasa ber a ni dawn a ni.
Texas leh Ohio-ah te pawh Democratic-in governor thar an nei dawn a. A lehlamah President Trump-a thlawptu langsar tak, Vivek Ramaswamy-a chu Ohio-ah governor inchuhnaah a chak lo zawkah a tang bawk.
Tun tum inthlana Republican-te chet that loh chhan langsar ber nia sawi chu an ram chhunga khawsak man (cost of living) sang ta lutuk leh thil man hrim hrim to chak lutuk chu a ni.
Trump-a sorkar hian ram dang lakah chhiah sang tak a lak avangin an rama thil an lak luh man a sang lo thei lo va. Hei bakah hian Israel nen Iran an beih avanga tuialhthei phurh kualna kawng a buaithlak tak avangin khawvel hmun dangte rualin petrol leh diesel man a sang zui ta em em a, hei hian mipuite a tithinur a, an tawrh phah ta niin mi thiamte chuan an ngai.
An chak lo tih a chian hnuah President Trump-a hian inthlan result chhuak chu a pawm thlap thu leh hnehna changtu, Democrat-te a lawmpui thu a sawi a. Hetih rual hian kum hnih chhung president hun a la neihah an party-in thil rawtah eptute nen an thawhho thiam a ngai dawn hle tih a tar lang bawk.