Aizawl: Health Minister Lalrinpuii chuan Conference Hall, Royale Lalawi Hotel-ah Mizoram State AIDS Control Society (MSACS) buatsaih Surakshit Districts (Mobilization for AIDS Suraksha – MAS) chawimawina ‘Samaan Samaaroh’ hun chu Nilaini khan khuallian nia hmanpuiin, tun hnaia Surakshit district-a puan tak Saitual, Mamit, Hnahthial leh Khawzawl district hotute hnenah lawmpuina leh chawimawina thilpek a hlan.
Health Minister chuan National AIDS Control Organisation (NACO) ruahmanna hnuaia December 1, 2026 ral hmaa 95:95:95 target leh Triple Elimination (nu atanga naupai laia HIV, Syphilis leh Hepatitis-B inkaichhawng tur umbo) hlawhtlin tak zet piah lamah, December 1, 2027-a hetiang hri darh zel hi thunun hman chu sorkar thiltum lian ber a nih thu a sawi.
He target puitlin veka, Surakshit district nihna chang ta district palite inpekna leh sorkar hotute, tlawmngai pawl te leh kohhran hrang hrangte thawhhona chu fakawm a tih thu sawiin, tha thlah lova tang zel turin a chah bawk.
Saksham district panga – Siaha, Lawngtlai, Serchhip, Kolasib leh Champhai, leh Sangharsheel district pahnih – Lunglei leh Aizawl-te pawh thahnemngaihna thar nen tan la zual sauha Surakshit dinhmun thleng thuai turin a fuih.
He hun hi MSACS Project Director Dr. Jane Rinsangi Ralte-in a kaihruai a ni.