Manipur-a Noney district, Tadaijing-ah National Socialist Council of Nagaland-Isaac Muivah (NSCN-IM) leh Zeliangrong United Front-Jenchui (ZUF-J) ralthuam keng pawl nia hriatte inbeihnaah mi pathum an thi niin police officer-ten an sawi.
Officer-te hian inkahna hi Nilaini zing dar 3.30 vela thleng niin Nungba Police Station khawchhak lam km 19 vela hlaah a nih thu an sawi.
Thite hi Noney district-a Pungmol khua, Aihung Khumba (22), Gangluan Part IV khua, Meijanthui Thaimei (25) leh Awangkhul khua, Gainingam Kamei (20) te an ni a. Eng pawla mi zawk nge an nih erawh finfiah theih a ni rih lo.
Police officer-te chuan an ruang hi Nungba-a community health centre-ah post mortem a ni a, an chhungte theuh hnenah hlan zui a ni tih an sawi.
Hetih lai hian Rongmei Naga Luphuam, Rongmei Naga hnam leh hmeichhe pawlte chuan aurinna hmangin ralthuam keng pawlte chu intibuai lova inkap tawh lo turin an au.
Hetih lai hian Nilaini tlai khan Ukhrul district-a National Highway 202 (Ukhrul kaltlanga Imphal-Nagaland inkalpawhna) hruka TM Kasom-ah mi tu tih hriat lohten Imphal atanga Ukhrul pana tlan passenger phur lirthei an kap a; mahse, thi leh hliam an awm lo hlauh.
Naga-Kuki buaina hi May 13-a inlambunna chi hnih, kohhran hruaitu mi pathum tela mi pali thihna a thlen atangin a nasa zual a. Inlambunna thlen hnuah hian mi 48 ruk bo zui an ni a, hemi duh lo hian lungawi loh lantir, punkhawm leh inkar bakah kawngpui dan te pawh a awm zui.
Manipur-a chi leh chi inkara buaina hi Meitei leh Kuki inkar atanga tan niin tunah chuan hnam thum an buai tawh a. Meitei leh Kuki-Zo hnam hian May, 2023-a an buai atang khan an chenna chin chu inkalpawh theih loh turin an khar ve ve a. Hnam hnih buaina avang hian mi 300 chuang thi an awm tawh a, mi 60,000 chuang himna zawnga tlanchhia an awm tawh bawk.