Aizawl: Power & Electricity Minister F Rodingliana chuan Tuirial Hydro Power project khawih tura sorkarin a rawihte hnenah hun tiam bituk chhunga hnate thawk zo turin a hrilh.
Nilaini khan Mizoram House, Chanakyapuri New Delhi-ah F Rodingliana hian Tuirini Hydro Power Project-a International Consultant atan sorkarin a rawih, STEAG Energy Services Limited leh Convolution Engineering Consultancy LLP te review meeting a neihpui a. He meeting-ah hian Tuirini khuah project hna chak zawka a kal theih nan contract agreement-a hun tiam bituk chhunga hnate thawk zo turin leh, a thawk zo lote chungah penal provision lekkawh zui a nih tur thu a hrilh.
Consultant-te hi technical thilte leh environment bakah social issue hrang hrangah Tuirini PMU pui a, monitoring & supervision ti tura rawih an ni.
P&E minister hian tuikhuah leh civil infrastructure ngai lova lui tui luang chakna hmanga power siam chhuahna Hydro Kinetic Turbine siamtu company MACLEC te factory tlawh bawkin, an technology hmuchhuah thar hi a zirchiang bawk.
He khawl thar hi a siam hunchhung a rei lo va, lui tui khuah ngai lovin ram tihchhiat tur a awm miah loh bakah, a siam man leh power tharchhuah man a tlawm a, lui te zawkah pawh a tul dan a zirin siam rem zel theih a ni.
Central Electricity Authority (CEA) leh MNRE-te pawmpui tawh a nih avangin Mizoramah pawh enchhin tura hmalak a nih tur thu P&E Minister chuan a sawi.