Cristiano Ronaldo-a’n ram tana inkhelh a tum tawh loh thu a puang a, he thu a puan hnuah hian a khelhpui thin te, a khingpui te, a thawhpui hlui te leh club hrang hranga miten thlahna thu an sawi hlawm.
Football khawvela mi langsar eng emaw zat bakah club thlengin Ronaldo thlahna thu hi an sawi a, heng zingah hian Neymar Jr., Vinicius Jr., Bruno Fernandes, Pepe, Al Nassr leh Manchester United te chu a langsar zual an ni.
Ronaldo hi chawimawina an hlan a, Portugal tana a zin kawng leh a sulhnu hnutchhiah ropui takte an chawimawi a ni.
Portuguese forward hi August, 2003 khan Kazakhstan an hmachhawn tumin substitute bench atangin a lut a, an ram tana a vawi khat khelhna a ni a. Instagram-a video message hmangin ram tana khelh a chawlhsan thu hi a puang a, kum 23 chhung Portugal aiawha a feh chhuah theih chhung zawng khan chhuang tak leh lawm taka a khelh thin thu a sawi.
Ronaldo chuan Portugal tana a zin kawng a tihtawp thu a puan chhuah rualin jersey number 7 chu mi dang hnena hlan chhawn a hun tawh thu a sawi a. He thutlukna hi rilru khawih tak a nih thu a sawi a, August, 2003-ah a zin kawng bul a tan a, a dam chhung nun a thlak danglam hlen tak thu a sawi chhuak.
A chawlh thu a puan hnuah hian ram tana Ronaldo khelhpui, Bruno Fernandes chuan Instagram story-ah Ronaldo-a’n a tih tak zeta a fuih fo avangin lawmthu a hrilh a. Portugal tana a khelh chhungin a naupan tet atanga a ngaihsan ber nena hun hlimawm an hmang dun thei chu nihlawh a intih thu a sawi.
“Ka kawm ve thei hrim hrim hi ka ngaih pawimawh ber leh lawmna thuk tak a ni a. Kan ram tan ka naupan tet atanga ka ngaihsan ber nen hun ropui tak tak kan hmang dun thei hi vannei ka inti a ni,” tiin Instagram story-ah a ziak.
Brazil player lar pahnih, Neymar Jr. leh Vinicius Jr. te pawhin Ronaldo chawlh puan post chu an chhang a. Neymar chuan ‘Legend’ tiin a ko a, Vinicius chuan ‘Forever number 1’ tiin a ziak bawk.
Saudi Pro League-a Ronaldo khelhna, Al-Nassr chuan Portugal chauh ni lo, khawvel huapa mi ropui a nih thu an sawi a, phek khat chu khar a ni tawh na a, club-ah hian chanchin thar ziah tur a la awm zel dawn tiin an sawi.
“Hei hi phek khat chauh a ni lo, nangmah ngeiin i din chanchin ropui tak a ni a. Portugal tan chauh ni loin khawvel pum tana entawn tur i ni. Portugal chu i thinlungah a awm a, nang chu khawvel thinlungah i awm a ni. Phek khat chu khar a ni ta; mahse, i inah hian kan pahniha chanchin thar ziah tur a la awm dawn chauh a ni,” tiin Al-Nassr chuan an ziak.
Portugal tana a khelhpui hlui, Pepe pawhin rilru khawih takin chawimawina a hlan a, “Football aia thuk zawk a ni a. Engkim avangin ka lawm e, Cris,” a ti.
Manchester United, Ronaldo club zin kawnga tum hnih a khelhna chuan ram tana a hun hman tawhnaah an lawmpui thu ziakin, ‘International career ropui tak i neih avangin lawmpuina kan hlan a che,’ tiin an ziak.
Al-Nassr forward chawlh vang hian football chanchina record duhawm ber berte zinga mi a titawp tih a entir a. Tleirawl tê a nih atanga Portugal captain a nih thlengin an ram chu chawimawina lian tak tak a lakpui a, Ronaldo telna Portugal team chu European Championship vawi ruk leh FIFA World Cup vawi rukah an inlan a ni.
Ronaldo hian ram tan vawi 234 a khel a, mipa zingah ram tana khel hnem ber a ni chiang hle a, goal 146 a thun pawh ram tana goal thun hnem ber record a ni a. A goal thun zat hi chawh rualin inkhel vawi khatah goal 0.62 thun ang a ni.
Ronaldo hian FIFA World Cup hrang hrang paruk – 2006, 2010, 2014, 2018, 2022 leh 2026 ah te a goal thunin World Cup vawi ruka goal thun thei hmasa ber a ni bawk.