Tum lian tak nei la, taima takin thawk rawh – Siami

Mizo hmeichhe hockey player chhuanvawr, Lalremsiami Hmar chuan chawimawina ropui tak, Arjuna Award, 2025 a dawn hnuah a hlim thu a sawi chhuak a. He chawimawina hian infiammi naupang zawkte, a bikin a pianna ram atanga chhuakte chu infiamna khawvela an suangtuahnate tihlawhtling tura an phur phah ngei a beisei thu a sawi.

Zirtawpnia chawimawina a dawn zawh hnuah Lalremsiami chuan Mizoram atanga Arjuna Award dawng hmasa ber a ni chu a lawm hle tih a sawi a, he a hlawhtlinnaah hian Mizoram mipuiten an lawmpui thu an hlan nasa hle tih a sawi bawk.

“Ka lawm tak zet a, a bikin Mizoram atanga Arjuna Award dawng hmasa ber ka nih vang hian ka lawm hle. Mizoram mipui zawng zawng an hlim a, lawmpuina min hlan nasa hle a, he chawimawina hian infiammi naupang zawk tam tak a fuih phur ngei ang tih ka ring tlat a ni,” tiin a sawi.

Mizorama hockey khelh châk infiam mi tharte tana mawhphurhna a neih chungchang sawiin, nu leh pa te, naupang leh thalai ten hockey khelh ve an châk thu an hrilh chuan phurna nasa tak a neih phah thin tih a sawi.

“Mizorama ka haw changa nu leh pa te, infiam mi te leh naupang tam tak ka hnena lo kalin hockey khelh ve an duh thu min hrilh hian nuam ka ti thin hle. Chutiang thu hriat chuan phurna nasa tak min pe a, ka hlim hle thin. Chuvangin, hockey khelh duh naupangte chu ka theih ang tawka tanpui ka tum dawn a ni,” a ti.

Siami chuan he chawimawina hi India ram pum, a bikin Mizorama thalaite tan a hlan thu a sawi a, a thalai puite chu an tum ram thleng turin tum lian tak nei a, taima taka thawk turin a chah a ni.

“He chawimawina hi thangthar te, a bikin India rama thalai zawng zawng te leh, a bikin Mizoram thalaite tan ka hlan a ni. Keini tan chuan Arjuna Award ang chawimawina zahawm tak dawn hi suangtuah phak pawh a ni ngai lo. Mahse, vawiinah chuan ka dawng ta a, Mizoramah hian thalai thiamna nei tha tak tak tam tak an awm tih ka ring a ni. Chuvangin, hei hi an tan entawn tur tha tak a ni a. Tum lian tak an neih a, taima taka an thawh zel chuan hetiang hun remchang hi an tan pawh a inhawng ve reng a ni,” tiin a sawi a ni.

Infiamna lama hlawhtlingte chawimawi leh lawmman pek nan kum tin National Sports Awards hi sem thin a ni a. Supreme Court judge hlui, Justice (Retd.) Arun Kumar Mishra kaihhruai selection committee rawtna zulzuiin, sawrkar chuan category hrang hrang hnuaiah heng infiammi, coach leh pawl hrang hrangte hnenah hian chawimawina hlan an rel a ni.

‘Arjuna Award for outstanding performance in Sports & Games’ hi kum 4 kal ta chhunga infiamna lama chet that vang leh hruaitu nih tling tak, infiammi rilru dik pu mai bakah inthununna nei tha te hnena an hlan thin a ni.

Leave a Reply

error: Content is protected !!