Manchester United-in an bân hnuah Michael Carrick-a chu inkhel thlirlawkna leh thlirletna sawitu, pundit ni turin a kir leh mai thei niin an sawi.
Kum 45 mi hi Old Trafford-a manager nghet a nih atanga ni 174 hnuah a hna atangin bân a ni a. Kum 40 chhunga division sang bera season bul an tan chhiat ber tum niin Premier League-a vawi 10 an khelhah vawi khat chiah an chak a, hei vang hian club chuan English manager nen hian inthen zai an rel ta a ni.
Season hmasa, January thlaah khan Carrick-a hian club hi enkawlin boruak a thlak danglam hle a. A enkawlna hnuaia league-a inkhel hnuhnung 17-ah vawi 12 chakpuiin a thawhrimna avangin manager nghet atan dah zui a ni.
A hlawhtlinna chu season tharah an chhawm nung zo ta lo a, tun dinhmunah 18-na an ni mek a. Aston Villa nena 4-4 a an inhnehtawk kha Manchester club a kaihhruai hnuhnun ber a ni ta a ni.
Carrick-a an bân thu an puannaah club chuan a inpekna leh a puitlinna an fak a, United legend a nihna a bo dawn loh thu an nem nghet bawk.
Bân a nih hnuah Carrick-a hma hun tur chiah hi hriat la ni lo mah se, amah hnaihtute chuan a luh lehna tur lam nia lang an sawi rik chu football club enkawl lam a ni lo va. The i Paper-in a tar lan danin management-ah kir leh a châk rih lo tih a tilang a, punditry-ah a lut leh zawk mai thei niin an sawi.
Hetiang hi Carrick-a tan thil thar a ni dawn lo a, nikuma Middlesbrough a chhuahsan hnuah khan Prime Video tan pundit hna a lo thawk tawh a ni.
A thawhpui thin commentator Steve Bower-a chuan kum tir lam khan Carrick-a thil thlir dan leh sawi fiah thiamna chu fakin, a punditry style chu tha chungchuang tiin a lo sawi tawh bawk.
Bower-a chuan, “Pundit tha chungchuang tak a ni a. A khelh dan leh a enkawl dan ang chiahin a tawng chhuak thin a. Mi a sawisel chiam ngai lo va, uchuak takin mi a fak chiam ngai hek lo. Kil tin atangin thil a thlir thin a. He hna hi kum 30 chuang ka lo thawk tawh a, pundit chi hrang hrang ka hmu hnem tawh a, ani hi chu football chungchang sawi tura piang ve hrim hrim a ni. Football ngaina em em a ni a, inkhel hi a hre chiang hle bawk. A khelhna position-a a khelh dan en khan a chhan hriatthiam a awlsam hle,” a ti.
“Kan hmuh tlan sa ringawt sawi nawn lo a, a chhan leh a nihphung sawi fiah kawngah hian a chungchuang bik a. A tawng lai chuan production staff-te pawh an ngawi thap zel a, football ngaina vek an nih avangin ngaihnawm ti takin an ngaithla thin,” a ti bawk.
A sawi zelnaah, “Kan hman thin mi tlem te – Glenn Hoddle, Michael Owen, Alan Shearer te ang bawkin inkhel i enin minute 90 chhungin thil thar zir chhuah i nei ngei ngei thin. Michael-a hi chu huang chhunga mi chu a ni. A tha ber pawl a ni,” a ti.