Chinese police-te chuan an ram chhimchhak lama Changsha-a in chim, mi eng emaw zat tang leh chin hriat loh an la awm mekna an chhuinaah mi pakua an man tawh tih an sawi.
Police hian in neitu bakah mi dang pathum, a saknaa mawhphurtute pawh an man tel tih an sawi.
Mi dang pangte hi Zirtawpnia in chim ta himna chungchang dik lo taka ziaka ‘a him tawk’ tia tar langtute an ni ve thung.
In chim chhan tak hi engnge tih thuneitute chuan an la hre thei rih lo tih an sawi bawk.
Inrinni khan President Xi Jinping-a chuan khawpui chhunga Wangcheng District-a in chim hi a tul ang zawng zawng buaipui tura thupek tichhuakin chhui hna thawk turin a ti a ni.
Changsha Mayor Zheng Jianxin chuan mi paruk chhanchhuah an ni tawh thu a sawi a, mi eng emaw zat, an zat hriat theih chiah lo tang leh engtin nge an awm hriat rih loh an la awm tih a sawi bawk.
In chim ta hi chhawng ruka sang a ni a, a tam zawk hi mihringin an luah a ni a, cinema enna hmun leh khualbuk a awm bawk.
Kangthelh pawl hotupa chuan sorkar enkawl broadcaster, CGTN hnenah a awmna hmun hi a chep em avangin chhanchhuah hna thawh zung zung a harsa hle niin a sawi a. Hmanraw lian la luta in chim senghawi thei tur lak a harsa niin a sawi.
A chim paha a bul chiaha awm inte a delh tel nual avangin hengte pawh hi chim zui ve mai thei a ni hlawm tih an sawi bawk.
China-ah hian in him tawk lo leh a sak dan kalhmang fel tawk lo te, tual chhung thuneituten an ei ruk nasat bawk avangtein in sak derthawng tak tak a tam hle.
Kumin kum tirah pawh khan Chongquing-a in pakhat chu boruakalhthei puk ru ni ngeia hriat puak zuiin a chim a, mi 16 velin an thih phah a ni.