India ram puma Covid-19 hri leng kai an tam avanga oxygen indaih loh thawm a rin mek lai leh a tuar na ber, New Delhi an buai em em laiin, khawpui chhehvela Sikh biakin (gurudwara) pahnihah chuan ‘oxygen langar’ siamin a duh leh mamawhin a thlawnin an pan thei.
Greater Kailash venga gurudwara pakhatah chuan oxygen bu ruakte chu a thlawnin an thunsak thei tih Indian chanchinbute chuan an tar lang.
New Delhi daia Ghaziabad-ah pawh oxygen hipna hmun siam a ni a, a rualin mi 80-in an hip thei.
Heng gurdwara-ah hian helpline pawh siam a ni a, oxygen mamawh leh damdawi lam mamawh tan biakpawh theih a ni.
India-ah hian khawpui ber chauh lo, khawpui lian dangah pawh Sikh temple eng emaw zatah Covid-19 kaite ei leh in tur siamin a mamawhte hnenah an pe thei bawk.
Tar lan fo tawh thin angin India-ah hian khawi laiah pawh hri leng hi a nasa tawh a. Khawpui ber, Delhi-ah phei chuan damdawi in khum, oxygen leh thawktu indaih lohna a nasat em avangin mipui an mangang tak zet tawh.
Ram dang atang pawhin India hian puihna a dawng nual tawh a, puih tum pawh an awm mek zel bawk.
Sorkarin hri kai leh thihpui hi tam hle tawh mah se mi thiamte chuan khawvela mihring tam ber dawttuna ramah hian a tak takah chuan hei aia tam daih hi a nih an la ring cheu bawk.