Hmeichhia, March thlaa West Bengal-a Birbhum district, Rampurhat-a in halna thlenga hliam tuar chu enkawl a nih mek laiin Pathianni tuk khan a thi veleh tih police-in an sawi.
Bogtui khuaa tual chhunga TMC hruaitu pakhat, Bhadu Sheikh-a thihna avanga phuba lakna nia sawia mi in halna thlenga thi hi mi 10 an tling ta a ni.
Police office pakhat chuan thi thar ber hi a taksa 27% kang chungin damdawi inah dah luh a ni tih PTI a hrilh.
“A dinhmun a that chhoh zel avangin chhuahtir a ni a; mahse, a dinhmun a hniam leh avangin Rampurhat Medical College & Hospital-ah dah luh leh a ni a. Pathianni zing hma takah khan a thi ta a ni,” a ti.
March 20-a Bogtui khuaa thil thleng hi Calcutta High Court chuan state police-in an chhui mekna atangin CBI kutah a hlan a, anni hian an chhui zui mek a ni.
March 19 khan tual chhung rorel khawla tel pakhat, Sheikh-a hi thah a ni a. Hemi thinrim phuba lakna ni ngeia hriatah hian March 20 zan khan Bogtui-ah hian mi tu tih hriat lohten in pariat zet an hal a, a tirah mi pakua an thi a, heng zingah hian naupang tawh an tel.
Thi zinga mi pasarih hi Sona Sheikh-a ina mite an ni a. Court thu anga CBI-in an chhui hnuah mi man leh thu zawh fiah pawh an nei nual tawh.