Ecuador president chuan an ram khawthlanng lam province pathumah pawikhawihna a hluar em avangin emergency a puang.
Guillermo Lasso chuan Guayas, Manabí leh Esmeraldas-ah te dan leh thupek khauh zawka kenkawh a nih theih nan curfew puan a ni a, sipai leh police officer tam zawk thawn an ni dawn tih Twitter-ah a tar lang.
Ecuador-ah hian tun hnaiah tualthahna leh mi sual pawl intihbuaina a pung nasa hle.
Tun tum hi Lasso-a’n nikuma a pisa a luah atanga tharum thawhna hmeh mih a nih theih nana emergency a puan vawi hnihna a ni.
“Kawtthlerte chu venhim hna thawktuten an luah ang,” tiin Lasso hian a tar lang a. Province pathumah hian police officer 4,000 leh sipai 5,000 dah an ni dawn tih a sawi bawk.
Hmun thlan bikah curfew pawh zan dar 11:00 atanga a tuk zing dar 5:00 thleng puan a ni zel ang a. “Kan muanna neih hi mi sual rualten min chhuhsak dawn lo,” a ti.
President Lasso hian Ecuador-a pawikhawihnate chu ruihhlo tawlh thinte vang niin a sawi a. Andean ram hi an thenawm, Peru leh Colombia atanga ruihhlo tawlh ruk kalkhawng niin Mexican drug cartel thiltithei tak takte pawhin tual chhunga mi sualte an thawhpui thin bawk.
Guayas province-a lawngchawlhna khawpui, Guayaquil chu khawvela tharum thawhna a thlen tamna ber 50-na niin Insight Crime chuan a tar lang a. Investigative journalism website hian Ecuador-ah hian kum 2021 chhung khan Latin America leh Caribbean ram zawng zawng zingah a pung nasa ber niin a tar lang bawk.
February khan Guayaquil bula Duran-a mipa eng emaw zat chan sawm an ni a. Mi pahnih kuta phuar chunga khai hlum leh mihring kalna leia mi khai hlum an awm bawk a, hengte hi Mexican drug cartel-te chet thin dan a ni.
Ecuador hi tan in chhunga buaina chhuaka thi tamna ber thin a ni bawk a, tan in chhunga mi sual pawl inep tangte intihbuainaah mi tam tak an thi thin.
September khan Guayaquil tan ina buaina chhuakah mi tang 119 vel an thi a. A hnu thla hnih pawhg tling lovah he tan inah veka buaina chhuak lehah mi 68 vel an thi leh bawk.
President Lasso hian tan ina buaina a chhuah hnu, October thla khan ram pumah ni 60 awh emergency a puang a. Hetianga a chetna hi Constitutional Court lam atanga dodalna a awm thin a, emergency hi ni 30 chauh puan theih a nih thu leh sipaite hian police beihpui thlak tawiawm chauh tur an nih laia a bultumtu an ni thin chu an sawisel.