Russian President Vladimir Putin chu a cancer zai niin thuneihna pawh an rama Security Council Secretary Nikolai Patrushev-a kutah a hlan rih niin United States-a New York Post chanchinbu chuan a tar lang a, finfiah erawh a ni lo.
Putin-a hi doctor-ten a inzai ngei a ngai an ti niin New York Post hian a tar lang a, an thu lakna hi Russian Foreign Intelligence Service lieutenant general hlui enkawl nia hriat, Telegram channel a ni tih news agency ANI chuan a tar lang bawk.
An zai leh a inenkawl dam inkar hi hun rei tak a ni dawn lo niin tar lan a ni bawk.
Putin-a hi tun hnaia vantlang zinga a inlanaah ngaihbel theih turin a damlo hmel a, a awm dan thin pangngai lo ang deuhvin a awm thin nia tar lan a ni a. New York Post chuan president hian cancer a neih bakah natna dang neuh neuh, Parkinson’s disease te pawh a nei niin an tar lang.
Chanchinbua Putin-a a damlo tih tar lan hi US thuneitute chuan engmah finfiahna an neih ve loh thu sawiin Pentagon thupuangtu, John Kirby pawhin, “Hemi lamah hian engmah harsatna a neih ka hmu ve lo,” a ti niin New York Post vek hian a tar lang.
Ni rei vak lo liam taah khan Putin-a hi Patrushev-a nen hian darkar hnih zel an titu niin New York Post chuan Telegram-a thu tar lan behchhanin a ziak bawk.
“Putin-a hian a mi rin ber leh a sorkara a thian tha ber a ni tih a lantir a ni,” tiin Telegram-ah hian tar lan a ni a. “Heng bakah hian president hian a hriselna a lo hniam zel hunah pawh an rama thuneihna chu Patrushev-a kuta hlan tur a nih thu a sawi bawk,” an ti.
“Patrushev-a hi a danglam bik lo va, Vladimir Putin-a aia a thatna a awm lo. A nunrawng zawk mah a, Putin-a aia mi bum thiam a ni a. Thuneihna a lo chang a nih chuan Russian-te avanga buaina hi a pung mai chauh a ni ang,” tiin chanchinbuin thu an lakna, Telegram channel neitu, Putin-a cancer an zai tih sawitu chuan a sawi.
“Putin-a hian thuneihna hi mi dang kutah rei tak a dah a rinawm loh,” tiin Telegram channel hian a tar lang zui a. Patrushev-a kuta an ram a awm hi ni hnih thum bak chu a ni thei lo niin New York Post hian a tar lang.