Mizoram hnenah vawk suat neitute zangnadawmna pek tur Vbc 5 chuang pe
|| Sem chhuah hun tur erawh la hre lo

Mizoram sorkarin African Swine Fever (ASF) vanga vawk suat neitute tana zangnadawmna a dil angin sorkar laipuiin a tum tur zaa 50, Rs vbc 5 chuang Mizoram a pe a, he sum hi finance department-in budget allocation-ah a dah tawh a, a sem chhuah hun tur erawh a la hriat loh.
Sorkar laipuia Ministry of Fisheries, Animal Husbandry & Dairying-in vawk suat neitute hnena zangnadawmna a pek tur, Mizoram sorkar hnena Rs 5,84,97,000 a pek chu budget allocation-ah dah a nih tawh thu AH&Vety department hotuten The Zozam Times an hrilh a, state sorkarin a tum ve tur erawh tihfel a la nih loh thu an sawi.
Sorkar laipuia scheme awm sa angin vawk suat neitute hnena zangnadawmna pek tur hi dil theih a ni a, sorkar laipui leh state sorkarin pawisa a inzata intum sem tur a ni a. State sorkarin a tum ve tur hi la tifel lo mah se sorkar laipui atanga sum dawn tawh hi a dawng tur hnenah pek phawt tur a nih thu Vety department hotute chuan an sawi a ni.
Vawk suat neitu, zangnadawmna dawng turte hi endik mek a nih thu an sawi a, “Kan hriat theih chinah chhungkaw 10,901 an ni a, hei hi final a la ni lo a, a la danglam thei,” an ti.
Zangnadawmna sum chu dang ding lai awm sa anga pek tur an nih thu leh vawk kg zat atanga chhuta pek tur a ni tih an sawi.
Vawk pul hri leng zel tur dan nana inkhuahkhirhna an siamte zawm lo an awm thin thu Vety department hotute chuan an sawi a, ASF hri leng thawh hnihna a thlen hnuah state pawn atanga lak luh tum vawk leh vawksate chu manin, thawn kir a nih tawh thu an sawi a; vawk an thawn kir chu Tripura atanga lak luh 46 a nih thu an sawi.
Tuna ASF hri leng thar leh hian nikum lama a len lohna veng leh khua a tuam deuh bik nia an hriat thu department hotute chuan sawiin mi tin fimkhur turin an chah bawk.
Kumina ASF a len leh hnuah vawk 1,805 chu hri vangin a thi leh tawh a, nimin khan vawk 80 thih belh lehin ASF vanga vawk suat 74 a awm belh leh a, heti hian vawk 707 suat a ni leh tawh. District parukah he hri hi a leng mek a, veng leh khua 29 a tuam tawh a ni.

Zangnadawmna pek dan tur:
Kg 15 hnuai lam – Rs 2,200
Kg 15-40 inkar – Rs 5,800
Kg 40-70 inkar – Rs 8,400
Kg 70-100 inkar – Rs 12,000
Kg 100 chung lam – Rs 15,000