Mara Autonomous District Council (MADC) inthlanpui atana Returning Officer Lalsangliana chuan Supply Minister K Lalrinliana chu election model code of conduct bawhchhiaa puh a nih avangin show cause notice a pe.
BJP Siaha district chuan supply minister hi Theiva khuaah MNF mi leh sate tan buhfai thahnem tak peah puhin, election model code of conduct bawhchhiaah ngaiin Returning Officer hnenah hian Thawhlehni khan complaint an thehlut.
Hemi chungchangah hian Lalsangliana chuan supply minister hi Thawhlehni vek khan show cause notice pein, Theiva khuaah Tipa- Supply Inspector kaltlanga buhfai thahnem tak dahtira an puhna chungchangah a chunga dan anga hremna lekkawh a nih lohna chhan tur chu ziaka May 10 chawhma dar 11:30 hma ngeia thehlut turin a hriattir.
Supply Minister K Lalrinliana chuan nimin khan show cause notice chhanna chu Returning Officer hnenah hian a thawn let ve nghal.
He lehkhaah hian Theiva khuaah hian Aadhar card nei lo leh Aadhaar link loh avangin chhungkaw tam takin an ration dawn thin aia tlem an dawng a, an ration dawn an kham loh thu a hnenah an thlen a,an bialtu inspector chu sorkar thu awmsa anga hma la tura hriattir a nih thu a tar lang.
Election model code of conduct hman lai anih anga inthlan zawh hma a lo pe chhuak lo tura hrilh a ni tih lehkhaah hian ziakin, buhfai hi pek chhuah a la nih loh thu a ziak lang bawk.