Mizoram Legislative Assembly Golden Jubilee (1972-2022) lawmna kal zelah nimin khan Deputy Speaker Er. Lalrinawma chuan Assembly Annexe building-ah district council hunlai atanga vawiin thlenga assembly kaihhnawih thlalak hlui leh thil dang chi hrang hrang phochhuahna, ‘Golden Jubilee Exhibition’ a hawng.
Exhibition May 4-10, 2022 chhung neih tur niin Zirtawpni thleng khian zirna in leh mipui tlawh theiha hawn a ni ang.
Mizoram Legislative Assembly chuan May 10 hian a kum 50-na ‘Golden Jubilee’ a thleng dawn ta a. Speaker Lalrinliana Sailo kaihhruaina hnuaiah a lawmna pui ber chu May 10-ah neih a ni ang a, jubilee pualin Assembly Special Session neih a ni ang.
Jubilee lawmnaah hian Lok Sabha Speaker O. M. Birla chu khuallian a ni ang a, session-ah thu a sawi ang.
Jubilee lawmna hrang hrang siamte hman mek a ni a, lungphun tur pawh peih tawh.
Kum 1952-ah Assam state hnuaiah Lushai Hills District a piang a, a hnuah Mizo District Council tiin a hming thlak a ni a. Union Territory a nih thlengin district council term li a awm hman a. Kum 1972-ah Mizoram chu UT-ah hlan kai a ni a, assembly session hmasa ber chu May 10, 1972-ah neih a ni. MLA thlan 30 leh nominated pathum, an vaiin member 33 an ni.
UT nih chhung hian inthlanpui tum li neih hman a ni a. Kum 1987 February 20 atangin Mizoram chu state a ni a, member pawh 40 thlan a lo ni ta a, nominated seat a awm ta lo bawk. State puilting nih hnuah inthlanpui tum riat a awm tawh a ni.
Mizoram Legislative Assembly-ah hian MLA 232 an awm tawh a, an zinga mi 92 chu an thi tawh a. Kum 50 chhung hian assembly session vawi 138 neih ni tawhin sitting vaw zat 955 neih a ni.
Government Bill 488 lut tawhin 477 passed a ni a, Private Member’s Bill panga lut tawhin pass a la awm lo.
Assembly committee hrang hrangten house-ah report 500 chuang an present tawh bawk.