England midfielder Jesse Lingard chuan tun nipuiah Manchester United chhuahsan turin thutlukna a siam fel a. Manager thar Erik Ten Hag awm dawn mahse chhuak turin a rilru a siam fel tawh.
Lingard hi United in tunhnai thla 12 chhunga an hman dan leh a hnena an thutiam ang a taka an hlen loh avangin chhuah a duh a. June thla a contract hmang zo tur Lingard hi Newcastle United, AC Milan, Juventus leh Paris St-Germain ten an ngaihven.
Kum 29 mi hi United manager thar tur hian a chhuah hma in inbiakna neihpui a duh niin an sawi mek a, nimahsela Lingard hian United a cham zui tura inbiakna neih erawh a duh lo.
Tunhnai player bazar hnuhnung pahnihah Lingard hian ngaihventu a ngah a, nimahsela United lamin a chhuah an phal lo.
Ole Gunnar Solskjaer leh Ralf Rangnick ten nikum nipui leh kumin kumtirah chhuak lo turin an hmin a, khelhna hmun chang tam zawk turin an tiam chu a takah a thleng lova. Tun season-ah Premier League match hnih chiah inkhel bul a tan.