MJA, Gen. Hqrs., Aizawlin nimin khan MAL Book of the Year 2021 atana thlan, ‘Hnam ropuite u, tho r’u le’ tih ziaktu, an member, Lalhruaitluanga Chawngte, News Editor, The Aizawl Post hnenah lawmpuina thuziak leh Rs 10,000 an hlan.
A kutchhuak lehkhabu Book of The Year atana thlan a nih lawmpuina MJA-in nimina Aizawl Press Club-a a buatsaihah Lalhruaitluanga Chawngte chuan Pathian malsawmna a dawn nasat thu sawiin, “Book of the Year hi ka beisei miah loh a ni a, kan rilruah a lang pha lo, ka insit hial zawk a ni,” a ti a. MJA-in a lawmpui avanga a lawmthu pawh sawiin, “MJA member satliah ka ni a, MJA tan tangkaina ka nei lo. MJA-a ka thiante zawng zawng chungah ka lawm takzet. Chanchinbua nitina thu kan ziah hian min pui nasa a, chanchinbua thiam lo chung chunga ka awm ve hi ka hlâwkpui takzet a ni,” a ti bawk.
MJA President C. Lalrambuatsaiha’n Lalhruaitluanga hnenah MJA aiawha lawmpuina thuziak leh thilpek hlanin, mi tam takin diary pawh an ziah that peih loh thu leh lehkhabu ziah phei chu thil harsa lehzual a nih thu a sawi a. “Kan member Hruaitea lehkhabu kum 2021 chhunga lehkhabu chhuak 170 chuang zingah a tha bera an thlang hi kan lawmpui takzet a ni,” a ti.
C. Lalrambuatsaiha chuan Lalhruaitluanga Chawngte chu M.A (Literature) a nih avangin saptawngte pawha lehkhabu ziak thei tura a ngaih thu leh ziak ngei se a duh thu a sawi a, “A hlawhtlinna kan lawmpui a, a thlen chin hi kan chhuang. Tuna a thlen chinah hian duh tâwk mai lo se, sang zawk thleng turin ziak chhunzawm zel se,” a ti bawk.