Aizawl: Education minister Lalchhandama Ralte chuan Mizoram chu digital literacy-ah a hniam lo a, state dangte nena khaikhin pawhin a tha pawl tak a nih thu a sawi.
Nimina State Literacy Mission Authority (SLMA) Governing Council leh Executive Committee thutkhawmah Education minister chuan digital literacy-ah Mizoram a hniam loh thu hi a sawi chhuak a, “Chhiarpui neih hunah pawh New India Literacy Programme (NILP) tehfungah ziak leh chhiar thiam hian digital literacy a huam tel avangin heti lama kan hmasawnna hi hmuh hmaih loh nise,” a ti.
Lalchhandama Ralte chuan ziak leh chhiarah Mizoram chu a sang ber pawl a ni a, Mizoramin zahawmna a neihte chu vawn nung zel a tul thu sawiin, hemi kawnga Mizoram tithang mawi zel turin tanrual a tul thu a sawi.
Thutkhawmah hian Samagra Shiksha SPD Lalhmachhuana chuan NILP sawifiahin he programme hian kum 15-35 inkar a tinzawn thu te, kum 2030-ah India ram mipui chu ziak leh chhiar thiamtir vek tum a nih angin he programme hian ziak leh chhiar thiam lo mi vaibelchhe ngate chu a tinzawn dawn a, kum tin vbc khat zel thiamtir tum an ni dawn tih a sawi bawk.
He thutkhawmah hian Education Secretary Dr Lalzirmawia Chhangte, Social Welfare Secretary Sangchin Chinzah te, School Education Department leh Samagra Shiksha officer-te, service association hruaitute, kohhran leh tlawmngai pawl hruaitute an tel a ni.