Khualzin te fuankhawmna hmun lar Bali-a kum 700 chuanga upa leh an serh em em Hmawng kung hmaa saruaka thla latu Russian hmeichhe influence lar pakhat chu kum 6 thleng Jail bang zut leh sum tam tak chawi thei dinhmunah a ding.
Russian influencer Alina Fazleeva hian Bali, Indonesia-a a thlalak duh dan hian mi tam tak thin a tirim a, Babakan Temple awmna bul a lo ni lehzel bawk nen, tualchhung mite’na hmun thianghlima an ngaih a ni nghe nghe.
Instagram influencer hian followr 16,000 vel a nei mek a, thiam loh a chang a nih chuan a tlem berah kum 6 jail a tang ang. He thil thleng hian sorkar lam hotute thlengin khauh lehzuala hmalaka tumna a thlen a, ramchhunga lut thei tawh lo tura hrem hial an tum nia sawi a awm bawk.
Russian influencer hian Information and Electronic Transactions Act hnuaiah thubuai lian tak a hmachhawn ngei dawn niin a lang a, sum a chawi tur zat pawh hi a tam hle tura ngaih a ni.
Heti anga boruak tha lo leh rit tak a lo thlen takah chuan Alina pawh hian instagram atangin a thlalak hi a paih tawh bakah video hmangin ngaihdam a dil.
“Balinese leh Indonesian mipuite hnenah ngaihdam ka dil. Ka thil tih ah khan ka inchhir a, mualphothlak pawh ka ti. In rilru tihnat emaw hliam tumna reng reng ka nei lova, he lai hmun pawh hi ka lo hrechiang tawk lo a ni. Thingkung hnuaiah ka tawngtai a, hemi hnu hian police station-ah kal nghalin, thil thleng chungchangah ngaihdam ka dil a ni,” tiin Alina hian a sawi.