May ni 5,2022-a Mara Autonomous District Council (MADC) inthlanpui neiha vote tlate chu vawiin chawhma dar 10 atangin chhiar tan a ni dawn.
Vote tlate hi Siaha DC office complex-a DRDA conference hall-ah chhiar a ni dawn a, vote chhiarna Counting Hall pahnih A&B siam a ni a, table panga ve ve dah a ni a, tum khatah bial hnih zela ruala chhiar tum a ni.
Counting hall pahnih chu Inrinni khan buatsaih fel a ni tawh a, vote chhiar tura ruat counting official-te chu hemi ni vek hian training pek an ni. Nimin khan vote chhiar turte hian District Election officer Lalsangliana pisaah an duty-na hmun tur pawhna (randomisation) an nei.
Siahaa chanchinbumite zawhna chhangin he inthlanpui atan returning officer, Siaha Bawrhsap Lalsangliana chuan bial khatah vote a tam loh avangin vote chhiar hun a rei lutuk lo tura an beisei thu sawiin, vote thlak nana hman EVM an dahna pawh counting hall nen a inhlat loh avangin a lak chhung a rei dawn lo a, hei hian vote chhiar ranah pawh a puih an rin thu a sawi.
MADC hnuaia Member of District Council (MDC) seat 25 atana inthlanpui hi May 5, 2022 khan neih a ni a, MADC huam chhunga vote awm zawng zawng 42,342 atangin vote 36,039 a tla a, hei hi zaa 85.11% a ni.
Amotlah bial chu vote tlak thatna ber a ni a, 95.71% a tla a, vote tlak chhiatna ber, Siaha East-I bialah 74.68% a tla.
Tar lan tawh thin angin he inthlannaah hian MNF party chuan seat awm zawng zawng an chuh a, BJP-in seat 24, Congress-in seat 23, ZPM-in seat pariat leh independent candidate pali an awm a ni.
MADC inthlanpuiah hian party hrang hrangten sorkarna siam ngei tumin campaign pawh an beih ngawrh hle a, campaign theih hun chhung khan party headquarter hruaitu thahnem takin MADC huam chhung hi an chamchilh a, BJP party campaign puiin union minister-te pawhin siaha an cham chilh a. Vote thlak ni khan party hrang hrang hruaituten sorkarna an chan ngei an beisei thu chanchinbumite an hrilh hlawm a ni.