Aizawl: 14th Conference of Central Council of Health and Family Welfare (CCHFW) neih zawh takah Health Minister Dr R. Lalthangliana’n Mizoram sorkarin hriselna kawnga hma a lak dan hrang hrang a sawi.
Ministry of Health & Family Welfare, New Delhi leh Gujarat sorkar tangkawpin a buatsaihah Dr R Lalthangliana hian Mizoram sorkarin hriselna kawngah hma a lak dan chungchang sawiin, Sub-Centre Health & Wellness Centre tha taka kalpui a nih thute, ASHA/Health Worker te hnathawh dan, damlote kalchilh a, nau chhar thlenga an thawh dante a sawi a, thingtlang kilkhawr ber ber thlenga an fan chhuah thin thu leh damdawi in awm lohna hmunah an tangkaiziate a sawi.
Health Minister hian kum 2017 atanga NITI Aayog-in endikna a kalpui khaikhawma ‘Healthy States, Progressive India’ ah Mizoram chu state te ho zingah pakhatna a nih thu a sawi a. “Infant Mortality Rate (nau piang 1,000 zela thi zat)-ah phei chuan kan chhuanawm hle a, kum 2009-a IMR 36 ni kha kum 10 hnu, 2019-ah chuan pathumah a tla tawh a ni,” a ti.
Mizoram sorkarin state danga awm ve lo health clinic a ruahman thu leh health sub-centre anga kalpui a nih thu te, tun dinhmunah health clinic 200 vel awmin, neih belh zel tura hma lak mek a nih thu leh khawtlang hotute nen inrawn tlanga hmalak a nih thin thute a sawi.
Covid-19 chungchang sawiin Dr R Lalthangliana hian, “Hripui leng avanga kan harsatna tawh atanga kan inzir a ngai a. Mizoramin hripui dona kawngah kan ti tha nia min sawi chhan chu mi zawng zawng lan tan rual vang a ni,” a ti a. Hripui leng hi khuarel chhiatna chi dang nen a inan loh thu te, Central leh State level a Ministry/Department hrang hrangte thawhho dan tur mumal taka ruahmanna siam lawk a tul thu leh sorkar laipuiin hei hi ngai pawimawhin a rang lamin hma la se a duh thu a sawi bawk.
Health Infrastructure tih that a pawimawh thu sawiin health minister hian Mizoram mai bakah India ram hmun hrang hranga harsatna a tawh chu thawktu daktawr, nurse leh health worker te indaih lohna nasa lutuk hi a nih thu a sawi a. “Thingtlang kilkhawr leh hmun hla zawka chengten damdawi a hun taka an hmuh zung zung theihna turin ruahmanna kan siam a ngai a. Hripui leng kan hmachhawn leh hun atan hetianga kan inpuahchah hi a pawimawh a, thawktu leh hmanraw indaih lohna hi kan ngaih pawimawh hmasak ber a ngai a ni,” a ti a ni.
May 5-7, 2022 chhung khan Central Council of Health and Family Welfare hi Gujarat-ah neih a ni. Mizoram atangin Health Minister Dr R. Lalthangliana bakah hian Health Secretary R. Lalramnghaka leh Dr Eric Zomawia, Mission Director, National Health Mission te an tel a ni.